فایلی خەڵک؛ دانیشتووانی گوندەکانی پێنجوێن داوای قیرتاوکردنی ڕێگای گوندەکانیان دەکەن

ئاڤا نیوز

دانیشتووانی ژمارەیەک گوندی پێنجوێن بەهۆی خراپی ڕێگاوبانەکان ناڕازین و لەڕێگەی ئاڤاوە داوای بەدواداچوونی لایەنی پەیوەندیدار دەکەن. 

چیرۆکی سەرەکی: ڕێگای نێوان پێنجوێن و بەشێک لە گوندەکان وێرانەیە و قیرتاو نەکراوە، بە تایبەت لە وەرزی زستان هاتووچۆ تێیدا ئەستەم دەبێت، دانیشتووانەکەی دەڵێن کەس خەمیان ناخوا، لە کاتی هەڵبژاردنەکان بەڵێنی زۆریان پێدراوە، بەڵام تا ئێستا هیچیان بۆ نەکراوە.

لێدوانی فەرمی: خەلیفە حەسەن، دانیشتوویەکی گوندی کانی میرانە لەگەڵ پیاو ماقوڵانی گوندەکە دەڵێن: لە بەرپرسانی سلێمانی بی ئومێد بووین، هەر قیرەکەمان بۆ ناکەن، خەڵکی 12 گوند نزیکەی 12 دەفتەر دۆلارمان کۆکردەوە دامان بە کۆمپانیایەک وتمان قیرەکەمان بۆ بکە، کەچی خاوەنی کۆمپانیا بۆی نەکردین و وتی دەبێت پارەی تەواوم پێ بدەن ئینجا قیری دەکەم.

بۆچوونی لایەنی بەرامبەر: ئاودێر محەممەد  پەیامنێری ئاڤا پەیوەندی بە ئەمیر جەمال، بەڕێوبەری فەرمانگەی چاککردن و پاراستنی ڕێگاوبانی پێنجوێن کردووە و پیی ڕاگەیاندووە، سەرەڕای ئەوەی ئەم پرۆژەیە 12 ساڵە وەستاوە، ئێستا لەهەوڵداین لە وەزارەتی ئاوەدانکردنەوە دۆسیەکە بجوڵێنینەوەو دەستبکرێت بە قیرتاوکردنی ڕێگاکان.

ئەوەی پێویستە بیزانیت: خاکی ئەو ناوچەیە بە پیتە بۆ کشتووکاڵ، بەتایبەتی زۆربەیان خەریکی تەماتەو شووتی ڕواندنن.