گەنجێکی هەولێر؛ خۆشەویستی پیاوان و ناحەزی ئافرەتانە

 

ئاڤا نیوز

گەنجێکی هەولێر لە ماوەی ساڵێکدا لە سووریا ژنی بۆ هەزار پیاوی کورد دۆزیوەتەوە و پڕۆسەی هاوسەرگیری بۆ کردوون، بە نیازە لە داهاتوو جگە لە سووریا، لە فەڵەستین و ئۆکرایناش ژنیان بۆ بدۆزێتەوە،

چیرۆکی سەرەکی: سەردار عەبدوڵڵا، گەنجێکی شاری هەولێرە، لەماوەی ساڵێکدا لە سووریا پڕۆسەی هاوسەرگیری بۆ هەزار پیاوی کورد بە ڕەسمی و بە شەڕعی کردوون، وەک خۆی دەڵێت، هەیە ژنی یەکەمیەتی، هەیە دووەم و هەیە سێیەمیش.

شێوازی جێبەجێکردن: بە گوتەی سەردار، پیاوەکان ناویان تۆمار دەکەن، لە سووریاش ژنەکان دەدۆزێتەوەو لە ڕێگەی وێنە و ڤیدیۆ هەموو وردەکارییەکیان پێدەڵێت و  هەماهەنگی دروست دەکات، دواتر زاوا لەگەڵ خۆی دەباتە سووریا و بە ئاگاداری کەسوکاری ژنەکە، بە شێوەیەکی فەرمی و شەرعی مارە بڕینیان بۆ دەکرێت.

لێدوانی فەرمی: سەردار عەبدوڵڵا بە ئاڤا میدیای ڕاگەیاند، ئەو پیاوانەی پڕۆسەی هاوسەرگیریان بۆ دەکەم، بەماڵەوەیان دەڵێن، دەچم بۆ دوبەی یان تاران و ئیستەنبووڵ، کەچی بە فڕۆکە هەتا دیمەشق ناوەستین، لەوێ ژنەکەی بۆ مارە دەبڕین و دەگەڕێینەوە، لێرەش هەر بە شێوەیەکی نهێنی شوقەو خانوو بۆ ژنەکەی دەگرێت و کەسیش پێی نازانێ.

سەردار ئاماژە بەوەش دەدات، پرۆژەم هەیە لە داهاتوودا نەک ژنی سووری، ژنی فەڵەستینی و ئۆکراینیش بێنم بۆ پیاوانی کورد.