کۆمیسیۆن ژمارەی ئەو لایەنانە ئاشکرا دەکات کە بەشداریی لە هەڵبژاردن دەکەن

ئاڤا نیوز

 

بەهۆی سەرپێچیکردنیان لە ڕێنماییەکان، کۆمیسیۆنی هەڵبژاردنی عێراق مۆڵەتی کارکردنی لە سێ حیزب هەڵوەشاندووەتەوە، ئاشکراشی دەکات کە ئێستا 310 حیزب لە کۆمیسیۆن تۆمارکراون.

 

وێنە گەورەکە: پێشتر دەستەی دادوەری کۆمیسیۆنی هەڵبژاردنەکانی عێراق لە دوایین بڕیاریدا ڕایگەیاند: لەسەر سکاڵایەکی ئەنجومەنی ئاسایشی نیشتیمانی کۆبووەتەوە کە تایبەتبووە بە هەڵوەشاندنەوە و وەرگرتنەوەی مۆڵەتی کارکردن لە سێ حیزبی سیاسی کە ئەوانیش بریتی بوون لە  "حیزبی ئازادی و دیموکراسی ئێزدی، حیزبی بەرەی خەباتی دیموکراتیک و حزبی  تەڤگەری ئازادیی کۆمەڵگای کوردستان (تەڤگەری ئازادی)".

 

ئەوەی پێویستە بیزانیت: بەبڕیاری دەستەی دادوەریی هەڵبژاردنەکانی عێراق، ناوەڕاستی ساڵی ڕابردوو مۆڵەتی کارکردن لە سێ حیزب وەرگیرایەوە ئەویش بەهۆی نزیکیان لە پەکەکە کە لە عێراق ڕێكخراوێکی قەدەغەکراوە.

 

لێدوانی فەرمی: هێمان تەحسین، بەڕێوەبەری فەرمانگەی حیزب و ڕێکخراوە سیاسییەکان لە کۆمیسیۆنی هەڵبژاردنی عێراق ڕایگەیاند، هەڵوەشاندنەوەی حیزبەکان دەکرێت لەسەر داواکاریی خۆیان بێت، یان بەهۆی پێشێلکردنی یاسای حیزبەکان، پێشکەشنەکردنی ڕاپۆرتی دارایی ساڵانە، وەرگرتنی هاوکاریی دەرەکیی و پەیوەندییان بە لایەنێکی دەرەکییەوە هەبێت.

 

ئەوەشی خستووەتەڕوو، ئێستا 310 حیزب بەشێوەیەکی فەرمی لەکۆمیسیۆن تۆمارکراون، ئەوانیش لە بەغدا و پارێزگاکان ناوەناوە سەردانیان دەکەن و چاودێرییان دەکەن، ئەگەر حیزبێکیش ماوەی سەرکردایەتی بەسەرچووبێت و کۆنگرەی نەکردبێت ئاگادار دەکرێتەوە و دەبێت کۆنگرە بکات، تا بتوانێت بەشداریی لە هەڵبژاردنەکاندا بکات.