نێچیرڤان بارزانی: سەردانەكەی پاپای ڤاتیكان بۆ كوردستان بۆ هەمیشە جێی شانازیمان دەبێت

ئاڤا نیوز

 

 سەرۆكی هەرێمی كوردستان بۆ كۆچی دوایی پاپای ڤاتیكان دەڵێت، یادی سەردانەكەی بۆ هەرێمی كوردستان لە 2021، بۆ هەمیشە زیندوو و جێی شانازیمان دەبێت.

 

چیرۆكی سەرەكی: ئەمڕۆ دووشەممە، 21-4-2025 پاپا فرانسیس، پاپای ڤاتیکان دوای تووشبوونی بە نەخۆشی هەوکردنی سییەکان لە تەمەنی 88 ساڵیدا کۆچی دوایی کرد، كە لەوەتەی ساڵی 2013ـەوە وەك 266ـەمین پاپای ڤاتیكان دیاریكرابوو.

 

پەیامی فەرمی: نێچیرڤان بارزانی، سەرۆكی هەرێمی كوردستان، به‌ناوی گه‌لی كوردستان و خۆیه‌وه‌، سه‌ره‌خۆشی و هاوخه‌میی قووڵی پێشكه‌ش به‌ جیهانی مه‌سیحی و ته‌واوی مرۆڤایه‌تی ده‌كات و ڕایگەیاند، پاپا فرەنسیس، سیمبولی ئاشتی و دادپەروەری و نزیكبوونەوەی نێوان گەلان و ئایینەكان و نموونه‌يه‌كی خاکه‌ڕایی و ڕۆحانيیه‌ت و به‌زه‌يی بوو.

 

دووپاتیشی كردەوە ئەو كه‌سايه‌تييه‌ مێژووييه‌ گه‌وره‌، ژيانی خۆی بۆ خزمه‌تی مرۆڤ و به‌رگری له‌ شکۆی مرۆيی و بڵاوكردنه‌وه‌ی په‌يامی خۆشه‌ويستی و پێكه‌وه‌ژيان ته‌رخان كردبوو.

 

- ئێمه‌ له‌ هه‌رێمی كوردستان، كه‌ فره‌يی و لێبورده‌يی و پێكه‌وه‌ژيان بنه‌مای كۆمه‌ڵگەكه‌مان پێكدێنن، ميراتی مرۆيی و ڕۆحیی پاپا فره‌نسیس به‌رز ده‌نرخێنین و نزا ده‌که‌ین و له‌ خوای مه‌زن داواکارین گیانی به‌ به‌زه‌یی و میهره‌بانیی خۆی شاد بکات و ئارامی دڵنه‌وایی به‌ هه‌مووان ببه‌خشێت.

 

- پاپا فره‌نسیس به‌ جه‌سته‌ کۆچی دوایی کرد، به‌ڵام یاد و په‌يامه‌كه‌ی، هه‌میشه‌ به‌ چرای هيوا و ئاشتی بۆ مرۆڤايه‌تی ده‌مێنێته‌وه‌، بۆ گەلی كوردیش یادی سه‌ردانه‌که‌یان بۆ هه‌رێمی کوردستان له‌ 2021، بۆ هه‌میشه‌ زیندوو و جێی شانازیمان ده‌بێت.