لە سلێمانی هاووڵاتیان ڕوو لە دانانی سیستمی سۆلار پاوەر دەکەن

ئاڤا نیوز

دانانی سیستمی سۆلار پاوەر (کارەبا لەڕێگەی وزەی خۆر) لە سلێمانی بەرەوپێشچوونێکی زۆر باشی بەخۆیەوە بینیوە و ژمارەی بەکارهێنەرانی زیاتر دەبێت.

وێنە گەورەکە: دوای ئەوەی بانکی ناوەندیی عێراق ڕێکارەکانی پێدانی قەرزی بانکی بۆ بەرهەمهێنانی ئامێری کارەبا بە وزەی خۆر دەرکرد، دەستکراوە بە پێدانی پێشینە بە هەر بانکێک بەبڕی 300 ملیۆن دینار، بانکەکان لەو بڕە پارەیە دەتوانن بڕی 30 ملیۆن دینار قەرز بدەن بە هەر یەکەیەکی نیشتەجێبوون، حکومەتی هەرێمی کوردستان کار دەکات بۆ ئەوەی هاووڵاتیانی هەرێمی کوردستان هاوشێوەی ناوچەکانی دیکەی عێراق لە وەرگرتنی قەرزەکە سوودمەند بن.

لێدوانی فەرمی: سیروان محەممەد، وتەبێژی کارەبای سلێمانی بە ئاڤا میدیای ڕاگەیاند: تاوەکو ئێستا 691 هاوبەشی کارەبا لە بەڕێوبەرایەتیی کارەبای سلێمانی ناوی خۆیان بۆ دانانی سیستمی سۆلار پاوەر تۆمارکردووە، بەرهەمی کارەباکەشیان 19.6 مێگاواتە.

ئاماژەی بەوەشدا، بەرەوپێشچوونێکی زۆر باش لە دانانی سیستمی سۆلار هەیە و مایەی دڵخۆشییە.

لە لایەکی دیکەوە: پێشتر سەنعان عەبدوڵڵا، وتەبێژی دەستەی پاراستن و چاککردنی ژینگەی هەرێمی کوردستان تایبەت بە ئاڤای گوت: لەپێناو پاکڕاگرتنی ژینگە و هەڵگرتنی مۆلیدە ئەهلییەکان، حکومەت پلانی داڕشتووە لە چوارچێوەی پڕۆژەی ڕووناکی (کارەبای 24 کاتژمێری) بۆ دانانی سیستمی وزەی خۆر، قەرزی درێژخایەن بە هاووڵاتیان بدات.

بۆچی گرنگە: بە بەکارهێنانی وەزی خاوێن (وزەی خۆر)، کاریگەریی ڕاستەوخۆ لەسەر پاکبوونەی ژینگەی ناوچە جیاوازەکان دەبێت، هەروەها هەزاران مۆلیدە لە کۆڵانەکاندا دەکوژێنرێنەوە.