دۆناڵد ترەمپ: بە دانوستاندانەکانی بەرنامەی ئەتۆمی لەگەڵ ئێران گەشبینین

ئاڤا نیوز

 

دۆناڵد ترەمپ، خۆشحاڵی خۆی دەردەبڕێت بە بەردەوامی دانوستاندنەکانی نێوان وەفدی ئێران و ئەمریکا و کۆبوونەوەکان بە ئەرێنی ناوزەند دەکات.

 

وێنە گەورەکە: ڕۆژی شەممە 19ـ 4 ـ 2025، گەڕی دووەمی دانوستاندنەکانی نێوان ئەمریکا و ئێران سەبارەت بە بەرنامە ئەتۆمیەکەی ئێران و پەیوەندییەکانی نێوان هەردوو وڵات لە ڕۆمای پایتەختی ئیتاڵیا بەڕێوەچوو، ئەمەش هەنگاوێک پەیوەندییەکانی نێوان واشنتن و تارانی بەرەو پێشەوە برد و بەپێی وتەی هەردوو وەفدی ئەمریکی و ئێرانی دانوستاندنەکەیان بە ئەرێنی بەڕێوەچوو، لەسەر هەمان پرس دۆناڵد ترەمپ، سەرۆکی ئەمریکا هەڵوێستی خۆی دەربڕی.

 

لێدوانی فەرمی: دۆناڵد ترەمپ، سەرۆکی ئەمریکا سەبارەت بە دانوستاندنەکانی وەفدی ئەمریکی و ئێرانی سەبارەت بە بەرنامە ئەتۆمیەکی ئێران ڕایگەیاند، ڕاپۆرتی ئەنجامی کۆبوونەوەکەی ڕۆمای بەدەست گەیشتووە و ئەوەی پێی وتراوە، " گفتووگۆیەکی زۆر باش لەگەڵ ئێران ئەنجامدراوە"، ڕاشیگەیاند کە  گەشبینن بە کۆبوونەوەکان و بە ئاراستەی ڕێککەوتنێکی زۆر باش هەنگاو دەنێن.

 

ئەوەی پێویستە بیزانیت: کۆبوونەوەکەی ڕۆما دووەم کۆبوونەوەی نێوان ئێران و ئەمریکا بوو دوای کۆبوونەوەی هەردوو وەفد لە مەسقەتی پایتەختی عومان، بڕیار وایە سبەینێ چوارشەممە 23 – 4 – 2025 شاندی تەکنیکی هەردوو وڵات لە عومان کۆببنەوە و  هەفتەی داهاتووش هەردوو وەفدی دیپلۆماسی کۆبوونەوەی سێیەم ئەنجام بدەن.