ناوی نۆ هەزار پێشمەرگە بۆ وەرگرتنی زەوی دەنێردرێت بۆ ئەنجوومەنی وەزیران

ئاڤا نیوز

 

وردبینی بۆ فۆڕمی نۆ هەزار پێشمەرگە بۆ سوودمەند بوون لە پرۆسەی وەرگرتنی زەوی تەواوبووە و ڕەوانەی ئەنجوومەنی وەزیران دەکرێت بۆ پەسەندکردن، چەند ڕۆژێکی دیکەش ناوی پێشمەرگەکانی یەکەی 80 دەنێردرێت.

 

وێنە گەورەکە: زیاتر لە 50 هەزار پێشمەرگە لە پرۆسەی وەرگرتنی زەوی سوودمەند دەبن، قۆناغ بە قۆناغ وردبینی بۆ ناوەکانیان دەکرێت و ڕەوانەی ئەنجوومەنی وەزیران دەکرێت، تاوەکو ئێستا نزیکەی 10 هەزاریان ڕەزامەندی ئەنجوومەنی وەزیرانیان هەیە بۆ وەرگرتنی زەوی.

 

لێدوانی فەرمی: سەربەست مەولوود، سەرپەرشتیاری تیمی وردبینیكردنی پێدانی زەوی بە فەرمانبەران لە وەزارەتی شارەوانی و گەشتوگوزاری هەرێمی كوردستان بە ئاڤای ڕاگەیاند، "وردبینی لە ناوی 9 هەزار پێشمەرگەی دیکە تەواو بووە لەماوەی دوو ڕۆژی داهاتوو ڕەوانەی ئەنجوومەنی وەزیران دەکرێت."

 

زانیاریی زیاتر: بەگوتەی سەرپەرشتیاری تیمی وردبینیكردنی پێدانی زەوی بە فەرمانبەران، "ئێستا وردبینی لە ژمارەیەک ناوی دیکە دەکرێت، کە پێشمەرگەکانی یەکەی 80 ـش لەخۆدەگرێت و لە چەند ڕۆژی داهاتوو ناو و فۆڕمی ئەوانیش دەنێردرێن بۆ ئەنجوومەنی وەزیران".