ئەم هەفتەیە زیاتر لە سێ هەزار خانەنشین کارتی بانکی وەردەگرنەوە

ئاڤا نیوز

پڕۆژەی هەژماری من ڕۆژ لە دوای ڕۆژ لە فراوانبووندایە، لەم هەفتەیەشدا زیاتر لە سێ هەزار خانەنشین کارتی بانکی وەردەگرنەوە و لەمەدوا هاوشێوەی مووچەخۆرانی دیکە لەڕێگەی ئەی تی ئێمەکان مانگانە مووچەکانیان وەردەگرن.

وێنە گەورەکە: ئەم هەفتەیە سێ هەزار 313 خانەنشین کە ڕێککەوتی لەدایکبوونیان لەنێوان ساڵانی 1920 تا 1940ـە، کارتی بانکی وەردەگرنەوە و بێ هیچ کێشەیەک مانگانە مووچەکانیان ڕادەکێشن.

چیرۆکی سەرەکی: لەماوەی ڕابردوودا هەموو مانگێک دیمەنی قەرەباڵغی و ژێرکەوتنی خانەنشینی بەساڵاچوو دووبارە دەبوویەوە، جا ڕووداوی نەخوازراو ڕوویدەدا، تەنانەت چەند خانەنشینێک لە نۆرەی مووچە گیانیان لەدەستدا. هەروەها تا خانەنشینێک مووچەکەی وەردەگرت، تەواو شەکەت دەبوو، بەڵام هەژماری من کۆتایی بەو دیمەنانە دەهێنێت. بەمەش ئەزیەت و ئازاری نۆرەی مووچە نامێنێت.

ئەوەی پێویستە بیزانیت: لەناو ئەو خانەنشینانەی کە ئەم هەفتەیە کارتی بانکی وەردەگرنەوە، چوار خانەنشینیان تێدایە تەمەنیان 105 ساڵە.

ئەمەش بزانە: هەر لەو خانەنشینانەی ئەم هەفتەیە کارتی بانکی وەردەگرنەوە سێ خانەنشینی تێدایە کە تەمەنییان 98 ساڵە. هاوکات یەک خانەنشینی 97 ساڵ و 18 خانەنشینی تەمەن 94 و 95 ساڵی تێدایە.