وەزیری دەرەوەی وڵاتانی عەرەبی کۆدەبنەوە

ئاڤا نیوز

ئەمڕۆ چوارشەممە بە بەشداری وەزیری دەرەوەی عێراق، لە میسر وەزیری دەرەوەی وڵاتانی عەرەبی کۆدەبنەوە و ئامادەکارییەکان بۆ لوتکەی عەرەبی لە بەغدا تاوتوێ دەکرێن، گرنگترین ئەو بابەتانەش جێگیر دەکرێن کە لە لوتکەکەدا باسیان لێدەکرێت.

وێنە گەورەکە: لوتکەی وڵاتانی عەرەبی کۆبوونەوەی 22 وڵاتی زۆرینە عەرەبی زمانە و ساڵانە لەسەر ئاستی سەرۆککۆمار و پادشای وڵاتان بەڕێوەدەچێت، تێیدا دیارترین ئەو ئاستەنگ و دەرفەتە هاوبەشانەی ڕووبەڕووی ئەو وڵاتانە دەبێتەوە تاوتوێ دەکرێن، بڕیاریشە 17ی ئایاری ئەمساڵ لوتکەکە لە بەغدا بەڕێوەبچێت.

لێدوانی فەرمی: قەحتان جەنابی، نوێنەری عێراق لە کۆمکاری عەرەبی ڕایگەیاند، ئەمڕۆ لە قاهیرە کۆبوونەوەی کۆمکاری عەرەبی لەسەر ئاستی وەزاری بەڕێوەدەچێت، شاندی عێراق لەلایەن فوئاد حوسێن وەزیری دەرەوە سەرۆکایەتی دەکرێت و تێیدا هەردوو لوتکەی عەرەبی و گەشەپێدان تاوتوێ دەکرێن کە مانگی داهاتوو لە بەغدا ساز دەکرێن.

زانیاریی زیاتر: بڕیارە لە لوتکەی عەرەبیدا دۆسیەی فەڵەستین، دۆخی وڵاتانی عەرەبی و ڕێگریی لە دەستوەردانی دەرەکی لە کاروباری ناوخۆییاندا لەگەڵ ژمارەیەک پرس و دۆسیەی دیکەی گرنگ تاوتوێ بکرێن.