لەسەر ڕووداوی سەرتاشینی حەوت قوتابی لیژنەیەکی لێکۆڵینەوە پێکدەهێنرێت

ئاڤا نیوز

 

بەڕێوەبەری قوتابخانەیەکی قەزای بازیان سەری حەوت قوتابی دەتاشێت، پەروەردەی سلێمانیش لیژنەی لێکۆلینەوەی لەسەر بابەتەکە پێکهێناوە.

 

وێنە گەورەکە: لە قوتابخانەی 'ڕاز' لە سنووری قەزای بازیانی سەر بە پارێزگای سلێمانی بەرێوەبەری قوتابخانەکە سەری حەوت قوتابی دەتاشێت و ئەمەش ناڕەزایەتی کەسوکاری قوتابیانی لێدەکەوێتەوە، بەشێک لە کەسوکاری قوتابیەکان ئەم کارە بە سووکایەتی دەزانن بەرامبەر منداڵەکانیان.

 

لێدوانی فەرمی: نەژاد عبداللە، بەرێوەبەری گشتیی پەروەردەی سلێمانی بە ئاڤا میدیای ڕاگەیاند، ئەمڕۆ لیژنەکانمان ناردووە بۆ قوتابخانەکە و لەگەڵ کەسوکاری منداڵەکان کۆدەبێتەوە، هەر کەسێک کەمتەرخەم بێت سزا دەدرێت.

 

زانیاریی زیاتر: "لە هەموو بارودۆخێکدا ئەو کارەی مامۆستاکە کردویەتی نایاساییە و لە دەرەوەی ڕێنماییەکانی پەروردەیە، بە دڵنیاییەوە لیژنەکە بە کاری خۆی هەڵدەستێت و لێپێچینەوەی تەواو دەکەین".

 

ئەوەی پێویستە بیزانیت: دوای لێکۆڵینەوە لە ڕووداوەکە کەسوکاری قوتابییەکان سکاڵا لەسەر بەڕێوەبەری قوتابخانەکە تۆمار دەکەن.