سوپای عێراق لەسەر زەوییە کشتوکاڵییەکانی جووتیارانی کورد بڵاوەی پێکرا

ئاڤا نیوز

 

لە بەرەبەیانیی ئەمرۆوە هێزێکی زۆری سوپای عێراق لە گووندی شەناغەی سەر بە ناحیەی سەرگەڕان بڵاوەی پێکراوە و کێبڵی کارەبای بیری ئاوەکانیان پچڕاندوە.

 

وێنە گەورەکە: زیاتر لە ساڵێکە سوپای عێراق فشارەکانی لەسەر جووتیارانی کورد توند کردووەتەوە، بەجۆرێک لە سەرەتای وەرزی چاندن و دروێنەکردنی بەرهەمەکانیان، هەڵدەکوتێتە سەر ئەو جووتیارانە و ڕێگە نادات لەسەر زەوییە کشتوکاڵییەکانیان کار بکەن.

 

لێدوانی فەرمی: محەممەد ئیسماعیل، موختاری گوندی شەناغە بە ئاڤا میدیای  ڕاگەیاند، سەرەڕای ئەوەی بڕیاری گەڕانەوەی زەوییە کشتوکاڵییەکانمان لەلایەن سەرۆکوەزیرانی عێراقەوە دراوە، بەڵام سوپای عێراق کار بە بڕیارەکە ناکات و ڕێگەش نادەن بچینەوە سەر زەوییەکانمان.

 

زانیاریی زیاتر: بڕیار بوو ئەمرۆ جووتیارانی گووندی شەناغە زەوییەکانیان ئاوبدەن بەڵام سوپای عێراق کێبڵی تەواوی بیرە ئاوەکانی پچڕاندوە و ڕێگە نادات هیچ جووتیارێک بچێتە سەر زەوییەکەی.