پەرلەمانی عێراق نیگەرانە لە دواکەوتنی خشتەی بودجەی 2025

ئاڤا نیوز

ئەنجوومەنی وەزیرانی عێراق لە ناردنی خشتەی بودجەی ساڵی 2025 بۆ پەرلەمان بەشێوەیەکی بەرچاو دواکەوتووە و هیچ وادەیەکی بۆ ناردنی دیار نەکردووە و پەرلەمانی عێراقیش نیگەرانە.

وێنە گەورەکە: وەزارەتی پلاندانانی عێراق، دوای هەڵسەنگاندن و ڕێکخستنی بڕگەکانی ڕۆژی 27-3-2025 خشتەی بودجەى ساڵی 2025ـی ڕەوانەی ئەنجوومەنى وەزیران کرد و ڕۆژنامەی سەباحی فەرمیی حکومەتی عێراقیش ئاشکرای دەکات، بڕە پارەی تەرخانکراو بۆ بودجەى 2025 دەگاتە 200 تریلیۆن دینار و کورتهێنانیش لەبودجەکەدا 64 تریلیۆن دینار دەبێت.

لێدوانی فەرمی: ئەمیر مەعمووری پەرلەمانتاری عێراق ڕایگەیاند: حکومەت زۆر دواکەوتووە لە ناردنی خشتەی بودجەی ساڵی 2025 بۆ پەرلەمان،  پێداچوونەوە و پەسەندکردنیشی  کاتی دەوێت.

- بەهۆی دابەزینی نرخی نەوت و بارودۆخی سەختی داراییەوە، حکومەت نیازی ناردنی خشتەی بودجەی ساڵی 2025 ـی بۆ پەرلەمان نییە، ئەمەش نیگەرانی پەرلەمانتارانی لێکەوتووەتەوە.

- زۆرێک لە پەرلەمانتاران بە نوسراوی فەرمی داوایان لە حکومەت کردووە،  هۆکاری دواکەوتنی ناردنی خشتەکە ڕوون بکاتەوە، بەڵام حکومەت تاوەکو ئێستا جگە لەبەڵێنی زارەکی، هیچ وەڵامێکی فەرمی نەداوەتەوە.

مەترسییە پێشبینیکراوەکان: سەندوقی دراوی نێودەوڵەتی و ئابووریناسان پێشبینی دەکەن کورتهێنانی بودجەی عێراق بۆ ساڵی 2025 بگاتە 7.6%، ئەگەر ڕێوشوێنی چاکسازی ڕیشەیی نەگیرێتەبەر.