مەزڵووم عەبدی لە هەولێرە و لەگەڵ وەزیری دەرەوەی فەرەنسا کۆدەبێتەوە

ئاڤا نیوز

ژان نوێل بارۆ، وەزیری دەرەوەی فەرەنسا لە هەولێر ڕایگەیاند، لەگەڵ مەزڵووم عەبدی، فەرماندەی هێزەکانی سووریای دیموکرات (هەسەدە) کۆدەبێتەوە و پێکەوە باسی چەند پرسێکی پەیوەست بە سووریا و شەڕی دژ بە داعش دەکەن. 

لێدوانی فەرمی: ژان نوێل بارۆ، وەزیری دەرەوەی فەڕەنسا کە ئەمڕۆ بە سەردانێک گەیشتە هەرێمی کوردستان،  لە کۆنگرەیەکی ڕۆژنامەوانی هاوبەشدا لەگەڵ نێچیرڤان بارزانی، سەرۆکی هەرێمی کوردستان ڕایگەیاند،  لەگەڵ مەزڵووم عەبدی کۆدەبێتەوە. ژان نوێل بارۆ ستایشی هەوڵەکانی هەسەدەی کرد بۆ ڕووبەڕووبوونەوەی تیرۆر، دابینکردنی ئازادی و پاراستنی فرەڕەنگی لە سووریا.

لە پەیامنێرەوە: کوردستان حەسەن، پەیامنێری ئاڤا کە لە کۆنگرە ڕۆژنامەوانییەکەدا بەشدار بوو، لەلایەن کونسوڵخانەی فەرەنسا لە هەولێر دڵنیاکراوەتەوە کە کۆبوونەوەکە ئەمشەو دەکرێت.

باکگراوند: وەزیری دەرەوەی فەڕەنسا دوای سەردانکردنی بەغدا و ئەنجامدانی ژمارەیەک کۆبوونەوە لەگەڵ بەرپرسانی باڵای عێراق، ئێوارەی ئەمڕۆ گەیشتە هەولێر،لە هەولێر لەگەڵ سەرۆک مەسعود بارزانی، نێچیرڤان بارزانی، سەرۆکی هەرێمی کوردستان و سەرۆکوەزیران مەسرور بارزانی کۆبووەوە.