پەرلەمانی عێراق نیگەرانە لەدواکەوتنی خشتەی بودجەی 2025

 

ئاڤا نیوز

ئەنجوومەنی وەزیرانی عێراق لە ناردنی خشتەی بودجەی ساڵی 2025 بۆ پەرلەمان بەشێوەیەکی بەرچاو دواکەوتووە و هیچ وادەیەکی بۆ ناردنی دیارنەکردووە و پەرلەمانی عێراقیش نیگەرانە.

چیرۆکی سەرەکی: وەزارەتی پلاندانانی عێراق، دوای هەڵسەنگاندن و ڕیکخستنی بڕگەکانی ڕۆژی 2025-03-27،  خشتەی بودجەى ساڵی 2025ـی ڕەوانەی ئەنجوومەنى وەزیران کرد و ڕۆژنامەی سەباحی فەرمیی حکومەتی عێراقیش ئاشکرای دەکات، بڕە پارەی تەرخانکراو بۆ بودجەى 2025 دەگاتە 200 تریلیۆن دینار و کورتهێنانیش لەبودجەکەدا 64 تریلیۆن دینار دەبێت.

لێدوانی فەرمی: ئەمیر مەعمووری پەرلەمانتاری عێراق ڕایگەیاند:

٠ حکومەت زۆر دواکەوتووە لە ناردنی خشتەی بودجەی ساڵی 2025 بۆ پەرلەمان،  پێداچوونەوە و پەسەندکردنیشی  کاتی دەوێت.

٠ بەهۆی دابەزینی نرخی نەوت و بارودۆخی سەختی داراییەوە، حکومەت نیازی ناردنی خشتەی بودجەی ساڵی 2025ـی بۆ پەرلەمان نییە، ئەمەش نیگەرانی پەرلەمانتارانی لێکەوتووەتەوە.

٠ زۆرێک لە پەرلەمانتاران بە نوسراوی فەرمی داوایان لە حکومەت کردووە، هۆکاری دواکەوتنی ناردنی خشتەکە ڕوون بکاتەوە، بەڵام حکومەت تاوەکو ئێستا جگە لەبەڵێنی زارەکی هیچ وەڵامێکی فەرمی نەداوەتەوە.

ئەمەش بزانە: سندوقی دراوی نێودەوڵەتیی و ئابووریناسان پێشبینی دەکەن کورتهێنانی بودجەی عێراق بۆ ساڵی 2025 بگاتە 7.6%، ئەگەر ڕێوشوێنی چاکسازی ڕیشەیی نەگیرێتەبەر.