لە "نائومێدییەوە بۆ هیوا" کچێکی نەجەفی دوای هەوڵی خۆکوشتن هاوبەشی ژیانی دەدۆزێتەوە

ئاڤا نیوز

لە نەجەف بەهۆی توندوتیژی خێزانی، کچێک نائومێد دەبێت و هەوڵدەدات کۆتایی بە ژیانی بهێنێت، بەڵام دواتر بە هەوڵی پۆلیسی خێزانی ژیانی هاوسەرگیری پێکدەهێنێت و لە نائومێدییەوە بەوەر خۆشبەختی هەنگاو دەنێت.

چیرۆکی سەرەکی: کچێکی نەجەفی دوای ئەوەی بەهۆی توندوتیژی خێزانەکەی نائومێد ببوو و هەوڵی خۆکوشتنیدا، پۆلیسی خێزانیی هاوکاریی دەروونی پێشکەش دەکەن، دواتریش هاوسەری بۆ دەدۆزنەوە و ئەم نائومیدییەی بۆ  ژیانێکی نوێ دەگۆڕێت.

لێدوانی فەرمی: پۆلیسی خێزانیی لە پارێزگای نەجەف دەڵێت، ئەم کچە بەهۆی ئەوەی خێزانەکەی بە بەردەوامی توندوتیژییان بەرامبەری ئەنجامدەدا لە ژیانی خۆی بێزارببوو و هەوڵی خۆکوشتنی دابوو، بەڵام ئەوان پشتیوانیی دەروونی و کۆمەڵایەتییان پێشکەشکرد تا واز لە بیرۆکەی خۆکوشتن بهێنێت.

زانیاریی زیاتر: پۆلیسی خێزانیی تەنیا بەوە نەوەستاون بەڵکو هەوڵیانداوە لەڕووی کۆمەڵایەتییشەوە هاوکاری کچەکە بکەن، بۆیە پێشنیازییان کردووە کچەکە لەگەڵ یەکێک لەو پیاوانە هاوسەرگیریی بکات کە بەبەردەوامی سەردانی نەجەفی کردووە.

ئەوەی پێویستە بیزانیت: دوای ئەوەی هەردوولا ڕەزامەندی لەسەر هاوسەرگیرییەکە دەردەبڕن، هەر لەناو بنکەی پۆلیس ئەڵقەی هاوسەرگیریی دەگۆڕنەوە و پرۆسەکە لە دۆخێکی پڕ لە دڵخۆشیی و پێزانیندا بەڕێوەچووە.