مەسرور بارزانی: سەرەڕای مێژوویەک لە سەرکوتکاری، بەڵام ئیرادەی کورد نەشکاوە

ئاڤا نیوز

سەرۆکوەزیرانی هەرێمی کوردستان ڕایدەگەیێنێت، سەرەڕای ئەو هەموو سەرکوتکارییانەی کە لە مێژوودا بە سەر کورددا هاتووە، ڕۆح و ئیرادەی کوردی تێکنەشکاوە و کورد ڕزگاری بووە و ماوەتەوە.

لێدوانی فەرمی: سەرۆکوەزیران مەسرور بارزانی لە ڕێگەی ڤیدیۆوە لە کۆنفرانسێکی زانکۆی یێڵی ئەمریکی تایبەت بە جینۆسایدی کورد وتەیەکی پێشکەش کرد ڕایگەیاند، ئەمڕۆ هەرێمی کوردستانی عێراق بەڵگەیەکە لەسەر خۆڕاگری و هیوا. "ئێمە کۆمەڵگەیەکمان هەیە کە ڕێز لە ئازادی، پێکەوەژیان و شکۆمەندی دەگرێت و هەرێمەکەمان هەر پەناگەیەک دەبێت بۆ ئەو کەسانەی کە لە تووندوتیژی و سەرکوتکاری هەڵدێن."

- مەسرور بارزانی باسی لە خۆڕاگریی گەلی کورد لە بەرامبەر دژوارییەکان کرد و هاوکات داوای دادپەروەری و بەرپرسیارێتی بۆ عێراق و سەرجەمی کۆمەڵگەی نێودەوڵەتی کرد. ئەو گوتی، "ئەو وانەیەی کە لە جینۆسایدی کوردەوە فێری دەبین ئەوەیە کە دەبێت هەر کاتێک نادادییەکمان بینی بێینە دەنگ، تەنانەت ئەگەر ئەوە سەختیش بێت، چونکە بێدەنگی تێوەگلانە لە تاوان."

- جینۆسایدی دژ بە گەلی کورد تەنیا ڕووداوێک نەبووە کە جارێک ڕوویدا بێت، بەڵکو پڕۆسەیەکی دوور و درێژ بووە کە لە ناوەڕاستی 1970ـکانەوە تا 1991 لەلایەن ڕژێمی بەعس لە دژی گەلی کورد ئەنجام دراوە.

ئەوەی پێویستە بیزانیت: کۆنفرانسی 'مێژوو و میراتی جینۆسایدی کورد' لەلایەن سەنتەری کۆنفرانسی گریینبێرگ لە زانکۆی یێڵ ڕێکخرا بوو و ڕۆژی 24-4-2025 ئەنجام درا.