بۆ یەکەمجار حکومەتی نوێی سووریا بەشداری لە کۆبوونەوەی ئەنجوومەنی ئاسایشی نێودەوڵەتی دەکات

ئاڤا نیوز

شاندێکی باڵای حکومەتی سووریا بە سەرۆکایەتی وەزیری دەرەوە سەردانی ئەمریکای کرد و بۆ یەکەمجار بەشداریی لە کۆبوونەوەی ئەنجوومەنی ئاسایشی نێودەوڵەتیی کرد.

چیرۆکی سەرەکی: ئەنجوومەنی ئاسایشی نێودەوڵەتی کۆبوونەوەی مانگانەی خۆی لە ویلایەتی نیویۆرک لە ئەمریکا ئەنجامدا بۆ تاتوێکردنی دوایین پێشهاتەکانی سیاسی و مرۆیی لە سووریا. ئەسعەد شەیبانی، وەزیری دەرەوەی سووریا بۆ یەکەمجار ئامادەی کۆبوونەوەکە بوو.

ئەوەی پێویستە بیزانیت: پێش بەشداریکردنی لە دانیشتنەکەی ئەنجوومەنی ئاسایش، شەیبانی بەشداریی لە مەڕاسیمی بەرزکردنی ئاڵای نوێی سووریا کرد لەبەردەم بارەگای نەتەوە یەکگرتووەکان لە نیویۆرک.

پەیامی فەرمی: ئەسعەد شەیبانی، وەزیری دەرەوەی سووریا لە دانیشتنەکەدا گوتارێکی پێشکەش کرد و ڕایگەیاند:

٠ دوای هەڵکردنی ئاڵای سووریا لە پاڵ ئاڵای 193 وڵاتدا بە خۆشحاڵیەوە قسەتان بۆ دەکەم. ئەم ئاڵایە نوێنەرایەتی هێمای گۆڕانکارییە دوای چەندین ساڵ لە ئازار و قوربانی.

٠ فڕۆکەکان لە سووریا لەبری بەرمیلە بۆمب گوڵ دەخەنە خوارەوە.

٠ بە شێوەیەکی یەکلاکەرەوە ڕووبەڕووی بازرگانی بە مادەی هۆشبەر بووینەوە کە هەڕەشە بوو بۆ سەر ناوچەکەمان.

٠ حکومەت گرووپە چەکدارەکانی یەکخستووە و کۆتایی بە سەردەمی گرووپگەرایی هێناوە.

٠ بەم زووانە دەستەی دادپەروەری ڕاگوزەری و دەستەی بێسەروشوێنان ڕادەگەیێنین.

٠ سوریا هەمەچەشنە، بەڵام دابەشکراو نییە بەسەر تایفە و کەمینەکان، بەشێک لە جوولەکەکانی سووریا دوای ڕووخانی ڕژێم بۆ یەکەمجار گەڕانەوە بۆ وڵاتەکەیان و سەردانی شوێنی پەرسگاکانیان کرد.

زانیاریی زیاتر: ئەم سەردانە لە چوارچێوەی هەوڵەکانی دیمەشق دێت بۆ کەمکردنی سزاکانی ئەمریکا و نێودەوڵەتی کە بەسەریدا سەپێنراوە، لە کاتێکدا پشتڕاست نەکراوەتەوە ئایا شاندی سووریا هیچ دیدارێکی لەگەڵ بەرپرسانی ئیدارەی دۆناڵد ترەمپ دەبێت یان نا.