شاندی عێراق لەگەڵ ئەحمەد شەرع کۆدەبێتەوە

ئاڤا نیوز

شاندی عێراق بە سەرۆکایەتیی بەرپرسی هەواڵگریی عێراق لەگەڵ ئەحمەد شەرع کۆبووەوە و چەندین پرسی هاوبەش، بە تایبەتی پرسی ئەمنییان تاوتوێ کرد.

وێنە گەورەکە: جاری دووەمە عێراق بە ئاشکرا شاندی ئەمنی و هەواڵگریی ڕەوانەی سووریا بە سەرۆکایەتیی حەمید شەتری، سەرۆکی دەزگای هەواڵگریی عێراق دەکات بۆ گفتوگۆکردن لە سەر چەند تەوەرێک لەگەڵ سەرۆکی سووریا و بەرپرسانی ئەو وڵاتە.

زانیاریی بەدەستهاتوو: شاندەکەی عێراق بە سەرۆکایەتیی شەتری لەگەڵ ئەحمەد شەرع، سەرۆکی سووریا و چەند بەرپرسێکی دیکە کۆبووەوە و چەندین پرسیان تاوتوێ کرد لەوانەش؛ بەرەنگاربوونەوەی تیرۆر، ئاسایشی سنوور، ئاڵوگۆڕی بازرگانی و هەروەها ئەگەری نۆژەنکردنەوەی هێڵی بۆریی عێراق - سووریا بۆ گواستنەوەی نەوت لە ڕێگەی خاکی سووریاوە بۆ بەندەرەکانی دەریای ناوەڕاست.

زانیاریی زیاتر: شاندەکە لەگەڵ ئیدارەی مەزارگەکانی شیعە لە سووریا کۆبووەوە و دواتر سەردانی مەزاری زەینەبی کچی ئیمامی عەلی (د.خ) کرد.

لەلایەکی دیکەوە: ئاژانسی هەواڵی فەرمیی حکومەتی سووریا (سانا) ڕایگەیاند: هەردوولا جەختیان لەسەر هاندان بۆ وەبەرهێنان له نێوان هەردوو وڵات و واژۆکردنی ڕێککەوتنه بازرگانییەکانی نێوانیان کردەوە لە کەرتی نەوت و دانەوێڵە و پێکهێنانی لیژنه هاوبەشەکان بۆ بەدواداچوون بۆ جێەجێکردنی ئەو ڕێککەوتننامانەی واژۆ دەکرێن و ڕێککەوتنی دانانی میکانیزمەکانی بەکارخستنی دەروازەی سنووریی تەنف- وەلید لە نێوان هەردوو وڵاتدا.

 

ئەوەی پێویستە بیزانیت: لە میانی سەردانەکەدا شەتری پەیامێکی دووپاتکردنەوەی محەممەد شیاع سوودانی، سەرۆکوەزیرانی عێراقی گەیاندە ئەحمەد شەرع سەبارەت بە ئامادەبوونی لە لوتکەی عەرەبی کە بڕیارە لە 17ـی ئایار لە بەغدای پایتەختی عێراق بەڕێوە بچێت.


باکگراوند: ڕۆژی 2024-12-26، دوای تەنیا 18 ڕۆژ لە ڕووخانی دەسەڵاتەکەی ئەسەد، شاندێکی عێراقی بە سەرۆکایەتیی حەمید شەتری، سەرۆکی دەزگای هەواڵگریی عێراق سەردانی دیمەشقی کرد و لەگەڵ ئەحمەد شەرع، سەرۆکی ئیدارەی نوێی وڵاتەکە کۆبووەوە.