حەج و عومرەی عێراق: شتێک نییە بە ناوی حەجی بازرگانییەوە

ئاڤا نیوز

 

لەگەڵ نزیکبوونەوەی وەرزی حەج کردن، دەستەی حەج و عومرەی عێراق هۆشداریی ساختەکاری دەدات و دەڵێت، "شتێک بە ناوی حەجی بازرگانییەوە نییە".

 

چیرۆکی سەرەکی: ساڵانە لە وەرزی حەج کردن، لەسەر ئاستی جیهان بە سەدان هەزار کەس بە مەبەستی بەجێگەیاندنی فەریزەی حەج ڕوو لە سعودیە دەکەن، لە هەرێمی کوردستانیش پێنج هەزار و 120 کەس ئەمساڵ بۆیان هەیە سەردانی ماڵی خودا بکەن و ببن بە حاجی، مامەڵەی وەرگرتنی ڤیزا بۆ بەشێکی زۆریان کراوە، چونکە ئەمساڵ حەجخوازان ناتوانن بە ڤیزای بازرگانی و ساڵانە حەج بکەن.

 

ڕاگەیێنراوی فەرمی: دەستەی باڵای حەج و عومرەی عێراق لە بەیاننامەیەکدا ڕایگەیاند: لەگەڵ هەموو وەرزێکی حەجدا، لەلایەن کۆمپانیا ساختەکان و کەسانێکەوە ساختەکاری و فێڵکردن لە هاووڵاتییان بەناوی حەجی بازرگانی دەکرێت.

 

زانیاریی زیاتر: لە بەیاننامەکەی دەستەی باڵای حەج و عومرەی عێراقدا هاتووە: دەستەی باڵای حەج و عومرەی عێراق تاکە لایەنی فەرمییە پەیوەندی ڕاستەوخۆی لەگەڵ وەزارەتی حەج و عومرەی سعودیەدا هەیە، هاوکات پشکی عێراق لە حەجدا دیاریکراوە و تەنیا لە ڕێی تیروپشکی ئەلیکترۆنییەوە دەدرێتە هاووڵاتییان.

 

لەلایەکی دیکە: دەستەی حەج و عومرەی عێراق هاووڵاتییان ئاگادار دەکاتەوە، کە هیچ کەسێک ناتوانێت بە بێ وەرگرتنی مۆڵەتی پێشوەختە حەج بکات و  بە هیچ شێوەیەکیش نەکەونە داوی ئەوانەی بانگەشەی حەجی بازرگانی دەکەن.