فراکسیۆنی پارتی لەگەڵ سوودانی کۆدەبێتەوە

ئاڤا نیوز

فراکسیۆنی پارتی دیموکراتی کوردستان لە ئەنجوومەنی نوێنەرانی عێراق لەگەڵ سەرۆکوەزیرانی عێراق کۆدەبێتەوە، پرسە چارەسەرنەکراوەکانی نێوان بەغدا و هەولێر بابەتی گەرمی سەر مێزی گفتوگۆیان دەبێت.

 

وێنە گەورەکە: کاتژمێر 03:00ـی دوانیوەڕۆی ئەمڕۆ چوارشەممە 13-03-2024 فراکسیۆنی پارتی لە ئەنجوومەنی نوێنەرانی عێراق لەبارەی دوایین بڕیارەکانی دادگەی فیدراڵی و مووچەی مووچەخۆرانی هەرێمی کوردستان و کۆمەڵێک پرسی دیکە لەگەڵ محەممەد شیاع سوودانی، سەرۆکوەزیرانی عێراق کۆدەبێتەوە.

 

لێدوانی فەرمی: پرسەکانی بودجە، مووچە و یاسای نەوت و گاز، بەشێکی دیکەی گفتگۆی ئەندامی فراکسیۆنی پارتی و سوودانی دەبێت، جگە لەوەی هەر ئەندامێک بەگوێرەی ئەو لیژنەیەی لێیەتی كێشەکانی هەرێمی کوردستان دەخاتە بەردەم سوودانی.

د. سەباح سوبحی، ئەندامی ئەنجوومەنی نوێنەرانی عێراق وای بە ئاڤا نیوز گوت.

زانیاریی زیاتر: جێبەجێکردنی ڕێککەوتنی هاوپەیمانی ئیداری دەوڵەت، کە پارتیش بەشێکە لەو ڕێککەوتنە، تەوەرێکی دیکەی کۆبوونەوەی سوودانی و ئەندامانی فراکسیۆنی پارتییە.

 

ئەوەی پێویستە بیزانیت: زیاتر لە سێ مانگ لە ساڵی نوێ تێپەڕیوە تاوەکو ئێستا پڕۆژەیاسای هەمواری بودجە لە ئەنجوومەنی وەزیران ڕەوانەی ئەنجوومەنی نوێنەران نەکراوە، بە پەسەندکردنی ئەو پڕۆژەیاسایە کێشەی بودجە، نەوت و گازی هەرێمی کوردستان چارەسەر دەبێت، بەو پێیەی تێچووی بەرهەمهێنانی نەوت لە هەمواری بودجە جێگیر دەکرێت.