دەزگای ئاسایشی هەرێم: ئەوانەی هێرشیان کردە سەر لێپرسراوی مەڵبەندی سلێمانی دەستگیرکراون

ئاڤا نیوز

لە سلێمانی بە شەق و بۆکس هێرش دەکرێتە سەر لێپرسراوی مەڵبەندی یەکێتی و پاسەوانەکانی، بەهۆیەوە چەند کەسێک دەستگیر دەکرێن.

چیرۆکی سەرەکی: ئێوارەی ئەمرۆ شەممە 2025-04-26، لەکاتی هاتنە دەرەوەی زیاد جەبار، ئەندامی سەرکردایەتی و لێپرسراوی مەڵبەندی سلێمانیی یەکێتی لە تەلاری هونەر لە شاری سلێمانی، کۆنگرەیەکی ڕۆژنامەوانی ساز کرد، بەڵام لەناکاو چەند چەکدارێک بە بۆکس و شەق هێرشیان کردە سەر ناوبرا و پاسەوانەکانی، بەهۆیەوە دوو پاسەوان بریندار بوون.

زانیاریی پەیامنێر: پەیامنێری ئاڤا میدیا، چۆمان مەحموود لە شوێنی ڕووداوەکە زانیاریی لە شایەدتحاڵەکانەوە وەرگرتووە و دەڵێت: هێزی ئۆپەراسیۆنی یەکێتی کە لە هۆڵەکە جێگیرکرابوون، هێرشیان کردووەتە سەر پاسەوانەکانی زیاد جەبار. شەڕەکە بە بۆکس و شەق و چەقۆ بووە، دوو پاسەوانی زیاد جەبار بریندار بوو.

بڵاوکراوەی فەرمی: عەقيد سەلام عەبدولخالق، وتەبێژی دەزگای ئاسایشی هەرێم ڕایگەیاند سەبارەت بەم گرژی و ئاڵۆزیەی ئێوارەی ئەمڕۆ ڕوویدا، ئەنجوومەنی لێکۆڵینەوە لە ڕووداوەکە پێکهێنراوە، ئەوانەی سەرپێچی یاساییان کردووە و هێرشیان کردووەتە سەر پاسەوانەکانی زیاد جەبار، لێپرسراوی مەڵبەندی سلێمانی، سەرجەمیان دەستگیرکراون و ڕێکاری یاسایی بەرامبەریان گیراوەتەبەر.