فایلی خەڵک؛ لەبارەی دووکەڵی کارگەکانی پیرزین دڵنیایی دەدرێت

ئاڤا نیوز

چەند هاونیشتمانییەک لە پیرزین ڤیدیۆیەکیان بۆ ئاڤا ناردووە و دەڵێن، هەراسان بووینە لەگەڵ دووکەڵی کارگەکانی دەوروبەرمان. شەو و ڕۆژ دووکەڵ فڕێ دەدەنە هەواوە.

چیرۆکی سەرەکی: لە گرتە ڤیدیۆیەک کە بۆ ئاڤا نێردراوە دەردەکەوێت کە ژمارەیەک کارگە لە کۆمەڵگەی پیرزین لە شاری هەولێر، دووکەڵ فڕی دەدەنە هەواوە، دوای بەدواداچوونی ئاڤا دەرکەوت کە دووکەڵ نییە، بەڵکو هەڵمە.

لێدوانی فەرمی: دڵشاد هیرانی، بەڕێوەبەری ژینگەی هەولێر بە ئاڤای ڕاگەیاند: پێشووتر سەردانی ئەو کارگانەمان کردووە، ئەوەی لە ڤیدیۆکە دەردەکەوێت دووکەڵ نییە، بەڵکو هەڵمی کارگەی چپسە و هیچ زیانێکی نییە، چونکە هەڵمەکە لە دوای بەرزبوونەوەی بۆ چەند مەترێک نامێنێت، ئەگەر دووکەڵ بێت تا ئاستێکی زۆر بە ئاسمان بەرز دەبێتەوە.

زانیاریی زیاتر: بەگوتەی بەڕێوەبەری ژینگەی هەولێر، ئەوەی سکاڵای زۆر لەسەرە مۆلیدەکانن، بەڵام ئێستا خۆشبەختانە بەهۆی کارەبای پڕۆژەی ڕووناکی بەشێکی بەرچاوی مۆلیدەکان کوژێنراونەتەوە و دووکەڵیش کەمبووەتەوە.