ڕێكاری تووند بەرامبەر لێدانی بیری نایاسایی ئاو دەگیرێتەبەر

ئاڤا نیوز

 

بەڕێوەبەری گشتیی سەرچاوەکانی ئاو ڕایدەگەیێنێت، ڕێكکاری توند بەرامبەر ئەو كەسانە دەگرنەبەر كە بەدەر لە ڕێنماییەكان، بە نایاسایی بیر لێدەدەن.

 

وێنە گەورەكە: ئەمساڵ داهاتی ئاو بەتایبەت ئاوی ژێرزەوی بەهۆی كەمی ڕێژەی بارانبارین و گۆڕانكاری ئاووهەواوەوە دابەزیوە و ناگاتە سێیەكی ساڵێكی ئاسایی، ئەمەش ئەركی حكومەت و هاووڵاتیانی لە پاراستنی سامانی ئاو و بەفیڕۆنەدانی، قورستر دەكات.

 

لێدوانی فەرمی: د. کاروان سەباح هەورامی، بەڕێوەبەری گشتیی سەرچاوەکانی ئاو، لە لێدوانێكی ڕۆژنامەوانیدا ڕایگەیاند، دەستیان گرتووە بەسەر سەدان ئامێری لێدانی بیر بە نایاسایی و ئامێرەكانیش لەناوبردراون، ئەو ڕێكارەش بەردەوام دەبێت.

 

زانیاریی زیاتر: بەڕێوەبەری گشتیی سەرچاوەکانی ئاو دووپاتیشی دەكاتەوە، ڕێكاری توند بەرامبەر هەركەسێك دەگرنەبەر كە بەنایاسایی بیر لێدەدات.

 

خاڵە ئەرێنییەكان: حكومەتی هەرێمی كوردستان لە چەند ڕوویەكەوە كار لەسەر پاراستنی ئاسایشی سامانی ئاو دەكات، لەڕووی یاسایی و دامەزراوەییەوە؛ یاسای ژمارە 4ـی پاراستنی ئاوی هەرێمی كوردستان دەركراوە كە بە یاسا هاووڵاتییان پابەندكراون بە پاراستنی سامانی ئاو، لەڕووی كرداریشەوە لە سەردەمی كابینەی نۆیەمی حكومەت، ژمارەیەكی زۆر بەنداو و پۆند بۆ گلدانەوەی ئاو دروستكراون، بەمەبەستی سوودوەرگرتن لە ئاوی زێ و ڕووبارەكان و ئاوی بەدەستهاتوو لە بەفر و باران، چەندین پڕۆژەی ستراتیژیی ڕاكێشانی ئاویش لە تەواوبووندان كە گرفتی كەمئاوی شار و شارۆچكەكان بەیەكجاری چارەسەر دەكات.