دوای هێرشکردنە سەر زیاد جەبار یەکێتی ئەرکێکی نوێی پێدەسپێرێت

ئاڤا نیوز

ڕووداوی هێرشکردنە سەر زیاد جەبار، بەرپرسی مەڵبەندی یەکی سلێمانی یەکێتی و پاسەوانەکانی، بە شەق و بۆکس و چەقۆ لەلایەن هێزێکی ئەمنی و برینداربوونی دوو لە پاسەوانەکانی، دەنگدانەوەیەکی زۆری لێ کەوتەوە. بەرپرسان و سەرکردەکانی یەکێتی دەستە دەستە بۆ دڵنەوایی و پاڵپشتی سەردانی دەکەن.

چی ڕوویدا:  ئێوارەی دوێنێ شەممە، زیاد جەبار، بەرپرسی مەڵبەندی یەکی یەکێتی لە سلێمانی لە تەلاری هونەر دێتە دەرەوە، هێزێکی ئۆپەراسیۆنی سلێمانی بە شەق و بۆکس و چەقۆ  هێرش دەکەنە سەر خۆی و پاسەوانەکانی، بەوهۆیەوە دوو لە پاسەوانەکانی بریندار دەبن.

زانیاریی زیاتر: قوباد تاڵەبانی، چووەتە ماڵی زیاد جەبار و باوەشێکی گەرمی لێ داوە و دڵنەوایی داوەتەوە، پاشان خۆی چووەتە بارەگای سەرکردایەتی یەکێتی، هەموو ئەندامانی سەرکردایەتی بەڕیز وەستاون و تەوقەیان لەگەڵی کردووە و باوەشی تووندیان لێ داوە.

لە لایەکی دیکەوە: هەر دوای ئەم پێشوازییە، سەرکردایەتی یەکێتی لە بارەگای مەکتەبی سیاسی بە ئامادەبوونی بافڵ تاڵەبانی کۆبوونەوە.

لە کۆبوونەوەکەدا سەرەڕای ئەوەی دیسان دڵنەوایی زیاد جەباریان داوەتەوە، دڵنیایشیان پێداوە دامودەزگا ئەمنییەكان رێكاری یاسایی و ئینزباتی پێویستیان گرتووەتە بەر بەرامبەر بەوانەی لە ڕووداوەکەی دوێنێدا پەلاماری پاسەوانەكانیان داوە.

دواتر بافڵ تاڵەبانی بڕیاری پێکهێنانی لیژنەیەکی داوە بۆ ڕێكخستنەوە و چاكسازی لە كاروباری هێزە ئەمنییەكانی تایبەت بە دەزگا حیزبی و مەدەنییەکان.  خودی زیاد جەبار سەرپەرشتی ئەو لیژنەیە دەکات کە بۆ ڕێکخستنەوەی هێزە ئەمنییەکان پێکهێنراوە.