دوو هەواڵی نوێ و پێشبینییەک بۆ دۆزینەوەی تەرمی ئاڤێستا

ئاڤا نیوز

هەوڵەکان بۆ دۆزینەوەی تەرمی ئاڤێستا بەردەوامن. برایەکی ئاڤێستا دوای گەڕانەوەی لە ئەوروپاوە بۆ کوردستان و ڕاوێژکردن بە کۆمپانیایەکی نەمساوی، داوای لێبووردن لە تیمەکانی بەرگرسی شارستانی دەکات کە بە کەمتەرخەم تۆمەتباری کردبوون، بەرگری شارستانیش پێشبینی دەکات لە ئایندەیەکی نزیک ڕووباری مێرگەسۆر تەرمەکەی فڕێبداتە دەرەوە.

چیرۆکی سەرەکی: 22 ڕۆژ پێش ئێستا ئاڤێستا بەرزنجی تەمەن 27 ساڵ لە سنووری قەزای مێرگەسۆر کەوتە نێو ڕووبارە و تاوەکو ئێستاش تەرمەکەی نەدۆزراوەتەوە.

چەند ڕۆژێک پێش ئێستا برایەکی ئاڤێستا لە دەرەوەی وڵات دەگەڕێتەوە و سەردانی دەڤەری مێرگەسۆر دەکات، گلەیی لە تیمەکانی بەرگری شارستانی دەکات، دواتر دەست دەکات بە گرتنی وێنە و ڤیدیۆ و دیمەنی ڕووبارەکە، دواتر دەینێرێت بۆ کۆمپانیایەکە بۆ ئەوەی ئامێرێکی پێبڵێن بۆ دۆزینەوەی تەرمی خوشکەکەی.

زانیاریی زیاتر: براکەی ئاڤێستا پێشتر وەکو وەرگێڕ لەو کاری کردووە، کۆمپانیاکە دوای دیراسەکردنی دیمەنەکان، وەڵام دەداتەوە و دەڵێت، هیچ ئامێرێک نییە بۆ دۆزینەوەی تەرم لەو ڕووبارەی تۆ وێنە و ڤیدیۆکانت ناردووە، جگە لەو شێوە گەڕانە و پشکنینەی کارمەندانی بەرگری شارستانی نەبێت کە دەیکەن.

لێدوانی فەرمی: ڕەوەند هاودیانی، وتەبێژی بەرگری شارستانی سۆران بە ئاڤای وت، ئەو برایەی ئاڤێستا، دوای ئەوەی وەڵامی لە کۆمپانیاکە وەرگرت و دڵنیا بوو لە کارەکانی کارمەندەکانمان، داوای لێبوردنی لە بەرگری شارستانی سۆران کرد، لەو گلەیی و گومانەی پێشتر هەیبوو، دەقی وەڵامەکەی پێ نیشانداین، وتی ئەوەی ئێوە دەیکەن هیچی کەمتر نییە لەو کارانەی لە ئەورووپا دەکرێت بۆ دۆزینەوەی تەرم.

بەگوتەی وتەبێژی بەرگری شارستانی سۆران، گەڕان و پشکنین بەردەوامە بۆ دۆزینەوەی تەرمی ئاڤێستا، بەڵام ئێستا ئاوەکە زیادی کردووە و لێڵی ئاوەکە زۆرتر بووە، بەپێی پێشبینی ئەوان لە هەفتەی داهاتووەوە کاتیەتی ڕووبار تەرمەکە فڕێبداتە دەرەوە، هەرچەندە تەرم هەبووە گەیشتووەتە دوو مانگ ئینجا ئاو فڕێی داوە، چونکە ئاوەکە زۆر ساردە.