کار بۆ هاوتاکردنی مووچە و ئیمتیازی سێ توێژ لەگەڵ بەغدا دەدرێت

ئاڤا نیوز

کار دەکرێت بۆ زیادکردنی مووچە و ئیمتیازاتی کەسوکاری شەهیدان و ئەنفالکراوان و زیندانی سیاسیی و دەیان هەزار کەس دەگرێتەوە.

چیرۆکی سەرەکی: وەزارەتی کاروباری شەهیدان و ئەنفالكراوان و زیندانیانی سیاسی، سەرقاڵی كاركردنە بۆ  زیادكردنی مووچە و ئیمتیازی کەسوکاری شەهیدان و ئەنفالکراوان و زیندانی سیاسیی و هاوتاکردنیان لەگەڵ بەغدا، بۆ ئەو مەبەستەش بەم نزیکانە لەگەڵ دەزگای شەهیدانی عێراق کۆدەبنەوە.

لێدوانی فەرمی: عەبدوڵڵای حاجی مەحمود، وەزیری شەهیدان و ئەنفالکراوان بە ئاڤای گوت: نامەیەکمان ئاراستەی ئەنجوومەنی وەزیران کردووە بۆ ئەوەی بەپێی یاساکانی زیندانیایی سیاسیی ماف و ئیمتیازییەکانیان هاوتای عێراق بکرێت و کۆبووەنەوەیەک لەگەڵ دەزگای شەهیدانی عێراق بکەین. کار لەسەر ئەوەش دەکەین ئەو ئیمتیازەی بۆ کەسوکاری شەهیدان هەیە ئەوانەی هەرێمی کوردستانیش بگرێتەوە.

زانیاریی زیاتر: تەنیا زیندانیانی سیاسی ژمارەیان زیاتر لە 25 هەزار کەسە و بە لیژنە و بڕیاری دادوەر هەموو رێککارەکانی پشتڕاستکردنەوەیان بۆ کراوە، شموولی هاوتاکردنی مووچە و ئیمتیازاتەکان لەگەڵ بەغدا دەکەن.

ئەوەی پێشبینی دەکرێت: بە گواستنەوەی دۆسیەی زیندانیانی سیاسیی بۆ سەر دەزگای زیندانیانی سیاسی عێراق، کۆمەڵێک ماف و ئیمتیازیان پێدەدرێت، لەوانە: زیادبوونی مینحە، قەرەبووکردنەوەی ئەو ڕۆژانەی لە زیندان بوون، پێدانی زەوی و پارە بۆ کڕینی یەکەی نیشتەجێبوون و دابینکردنی بڕێک پارە بۆ چارەسەر یان خوێندن یاخود حەج و عومرە.