دادگای عێراقی بڕیاری بێتاوانیی حەلبووسی دەرکرد

ئاڤا نیوز

دادگای تێهەڵچوونەوەی فیدڕاڵیی عێراق، بێتاوانیی محەممەد حەلبووسی، سەرۆکی پارتی تەقەدوم و سەرۆکی پێشووی پەرلەمانی عێراقی دەرکرد و هەموو ئەو تۆمەتانەی ئاڕاستەی کرابوون، ڕەتکردەوە.

چیرۆکی سەرەکی: دادگای باڵای فیدڕاڵیی عێراق لە 2023-11-14، لەسەر سکاڵای ژمارەیەک پەرلەمانتار، کۆتایی بە ئەندامیێتی محەممەد حەلبووسی، سەرۆکی پەرلەمانی عێراق هێنا.

پەیامی فەرمی: محەممەد حەلبووسی، لە پۆستێکیدا لە تۆڕی ئێکس نووسیویەتی: "کاتێک ئەهلی حەق بەرامبەر بە باتڵ بێدەنگ دەبن، ئەهلی باتڵ پێیانوایە کە ڕاست دەکەن. ڕاستی باڵادەستە و هیچ شتێک لەوە بەرزتر نییە. سوپاس بۆ دەسەڵاتی دادوەری عێراق".

ڕاگەیێنراوی فەرمی: پارتی تەقەدوم لە ڕاگەیێنراوێکدا ئاماژە بۆ ئەوە دەکات، دادگای عێراقی بڕیاری بێتاوانیی محەممەد حەلبووسی، سەرۆکی پارتی تەقەدوم لە تۆمەتەکانی پێشووی دەرکرد. دادگا تایبەتەکان بڕیاری ڕەتکردنەوەی سکاڵاکانیان دەرکرد و تۆمەتەکانیان هەڵوەشاندەوە و لێکۆڵینەوەکەیان داخست. ئەم بڕیارانە لەلایەن دادگای تێهەڵچوونەوەی فیدڕاڵییەوە پەسەندکراون و پلەی کۆتاییان بەدەستهێناوە.

باکگراوند: هەریەک لە لەیس دلێمی و باسم خەشان، لە دادگا سکاڵایان لە دژی محەممەد حەلبووسی تۆمار کردبوو، سکاڵاکەی لەیس دلێمی لەسەر ئەوەبوو نامەی دەستلەکارکێشانەوەی بەناوی ئەو ساختەکردووە و خۆشی واژۆی لەسەر کردووە. سکاڵاکەی باسم خەشانیش لەسەر ئەوەبوو حەلبووسی گرێبەستی لەگەڵ کۆمپانیایەکی ئیسرائیلی واژۆ کردووە.