لەکاتی دروستکردنی پۆند و بەنداوەکان چی لە گۆڕستان و شوێنەوارەکان دەکرێت؟

ئاڤا نیوز

یەکێک لە پلانە ستراتیژییەکانی حکومەتی هەرێمی کوردستان دروستکردنی پۆند و بەنداوەکانە، بەمەش لیژنەیەک پشکنین بۆ سنووری ناوچەکان دەکات بۆ ئەوەی بزانرێت ئایا هیچ گۆڕاستانێک و شوێنێکی مێژوویی ژێرئاو دەکەوێت.

وێنە گەورەكە: لە هەرێمی كوردستان سێ بەنداوی سەرەكی و چەند بەنداوێكی مامناوەند و بچووك هەن، هەروەها لەڕێگەی چەندین پۆندەوە لە ناوچە جیاجیاكان بڕی پێویستی ئاو گل دەدرێتەوە، ئەو بەنداو و پۆندانەش کاریگەریی ئەرینی و درێژمەودا لەسەر ئەو ناوچانە دروست دەکەن.

لێدوانی فەرمی: ڕەحمان خانی، بەڕێوەبەری گشتیی بەنداوەكانی هەرێمی كوردستان بە ئاڤا میدیای ڕاگەیاند: لەکاتی دروستکردنی بەنداو و پۆندەکاندا، لیژنەیەکی شوێنەواریی پشکنین بۆ ناوچەکان دەکات تاوەکو بزانین ڕادەی ژێرئاوکەوتن لە چ ئاستێکدایە و دوایین گۆشەی پڕبوونەکەی لەکوێ دەبێت؟

گۆشەیەکی دیکە: لەبارەی ناوچەی شوێنەواری و گۆڕستان، ڕەحمان خانی گوتی: هەر شوێنەوارێک لەو ناوچەیە هەبێت کە بەنداوی لێ دروست دەکرێت و ئەگەری ژێرئاوکەوتنی لەسەر بێت، ئەوا پێویسە بگوازرێتەوە، بۆ گۆڕستانەکانیش خاوەنەکانیان ئاگادار دەکرێنەوە لەوەی مردووەکانیان بگوازنەوە بۆ شوێنی دیکە.

ئەمەش بزانە: ئەو بەنداوانەی مێژووی دروستکردنیان بۆ زیاتر لە 50 ساڵ دەگەڕێتەوە، چەندین شوێنی مێژوویی، گوند و گۆڕستانیان لەژێردایە.