گرووپێک لەڕێگەی کاری خێرخوازی بازرگانی بە ماددەی هۆشبەرەوە دەکەن

ئاڤا نیوز

لە شاری دهۆک گرووپێک لەڕێگەی کاری خێرخوازییەوە لەگەڵ بردنە دەرەوەی نەخۆش بۆ چارەسەر، بازرگانییان بە ماددەی هۆشبەرەوە کردووە، سەرجەم ئەندامانی گرووپەکە کە ژمارەیان 10 کەسە دەستگیرکراون و دانیان بە تاوانەکەیاندا ناوە. 

چیرۆکی سەرەکی: ناوەڕاستی ئەم مانگە بەڕێوەبەرایەتیی نەهێشتنی ماددەی هۆشبەرەکان لە دهۆک زیاتر لە 10 کەسی بەتۆمەتی بازرگانیکردن بە ماددە هۆشبەرەکان دەستگیر کردووە، هەموویان گرووپێک بوون و لەژێر ناوی ڕێکخراوێکی خێرخوازی، ماوەی زیاتر لە ساڵێکە کار دەکەن و بۆ چارەسەر نەخۆش دەبەنە دەرەوەی وڵات، نەخۆشەکان و ڕێکخراوەکەشیان بۆ بازرگانیکردن بە ماددە هۆشبەرەکان بەکارهێناوە.

زانیاریی تایبەت: هەموو جارێک بە هەمان ئەو ئۆتۆمبێلانەی نەخۆشیان بۆ وڵاتانی دەوروبەر گواستووەتەوە،  ماددەی هۆشبەریان لە ناو تایە و بەشە جیاوازەکانی ئۆتۆمبێلەکەدا شاردووەتەوە و گەیاندوویانەتە شوێنی مەبەست. هێزە ئەمنییەکان دەستیان بەسەر حەوت ئۆتۆمبێلدا گرتووە کە سەرجەمیان گرانبەهان و لەلایەن گرووپەکەوە بەکارهێنراون، بڕی 10 کیلۆ ماددەی هۆشبەریش بە گرووپەکە گیراوە.

ئەمانەش بزانە: سەرجەم ئەندامانی گرووپەکە خەڵکی پارێزگای دهۆکن و دوای دەستگیرکردنیان دانیان بە کارە نایاساییەکەیاندا ناوە. لەناویاندا ڕۆژنامەنووسێکی کچ و ئەکتەرێک هەن. ڕۆژنامەنووسە کچەکە وەک وەرگێڕ کاری بۆ گرووپەکە کردووە، کاتێک نەخۆشیان بردووەتە دەرەوەی وڵات لە نێوان نەخۆش و پزیشکەکان وەرگێڕ بووە.