عێراق بەدواداچوون بۆ دەستبەسەرداگرتنی موڵکی هاووڵاتیانی لە دیمەشق دەکات

ئاڤا نیوز

عێراق و سووریا لیژنەیەکی تەکنیکیی تایبەتیان پێکهێناوە بۆ بەدواداچوونی دەستبەسەرداگرتنی موڵکی عێراقییەکان لە دیمەشقی پایتەختی سووریا.

چیرۆکی سەرەکی: لە ماوەی ڕابردوودا، چەندین هاووڵاتیی عێراقی کە نیشتەجێی دیمەشق و دەوروبەرین، دەستبەرسەر موڵکەکانیاندا گیراوە، لەپێناو بەدواداچوون و وەرگرتنەوەی ئەو موڵکانە، باڵیۆزخانەی عێراق لە دیمەشق لیژنەیەکی یاسایی و تەکنیکی بە هەماهەنگی لەگەڵ دەزگا پەیوەندیدارەکانی حکومەتی سووریا پێکهێناوە.

ڕاگەیێنراوی فەرمی: باڵیۆزخانەی عێراق لە دیمەشقی پایتەختی سووریا لە ڕاگەیێنراوێکدا ڕایگەیاند: بەمەبەستی دڵنیابوون لە دەستبەسەرداگرتنی موڵکی عێراقییەکان لە سووریا، لیژنەیەکی یاسایی و تەکنیکی پێکهێنراوە کە لەگەڵ وەزارەتی دەرەوەی سووریا، وەزارەتی داد، دادگاکان و فەرمانگەکانی تۆمارکردنی خانووبەرە بەدواداچوون بۆ ئەم بابەتە دەکەن.

قووڵتر: باڵیۆزخانەکە داوای لەو عێراقییانە کردووە کە موڵکەکانیان دەستی بەسەردا گیراوە لە کاتی کارکردندا، سەردانی باڵیۆزخانەکە بکەن و ئەم بەڵگەنامانە لەگەڵ خۆیاندا بهێنن:

٠ کۆپییەک لە تۆماری خانووبەرە کە بە ناوی ئەو کەسە یان ئەندامانی خێزانی پلە یەکەوە تۆمارکراوە.

٠ گرێبەستێکی فەرمی لەلایەن پارێزگارەوە پەسەند کرابێت بیسەلمێنێت کە کرێچییە، هاوکات خاوەنی موڵکەکە ئامادە بێت.

٠ هێنانی وەکالەتی فەرمی خاوەن موڵکەکە.