هاوردەی چەک لە ئەوروپا زیاد و هەناردەی ڕووسیاش کەمی کردووە

ئاڤا نیوز

پەیمانگای توێژینەوەی ئاشتیی نێودەوڵەتی لە ستۆکهۆڵم (سیپری - SIPRI) ڕاپۆرتی خۆی سەبارەت بە پرسی مامەڵەی چەک لە سەر ئاستی جیهان بڵاوکردەوە.

ئەوەی پێویستە بیزانیت: بە گوێرەی ڕاپۆرتەکە لە ماوەی پێنج ساڵی ڕابردوودا هاوردەکردنی چەک لەلایەن وڵاتانی ئەوروپاوە بۆ نزیکەی دوو هێندە زیادیکردووە، هەناردەی ئەمریکا و فەڕەنساش زیادیکردووە و هاوکات هەنارەدی ڕووسیا بە ڕێژەیەکی زۆر دابەزیوە. 

زانیاریی زیاتر: هاوردەکردنی چەک لەلایەن وڵاتانی ئەوروپاوە لە ماوەی ساڵانی 2019-2023 بە بەراورد بە ماوەی ساڵانی 2014-2018 بە ڕێژەی 94% زیادیکردووە. بە هۆی شەڕی ڕووسیا و ئۆکرایناوە، ئۆکراینا کە لە 30 دەوڵەت چەک وەردەگرێت، بووە گەورەترین هاوردەکاری چەک لە سەر ئاستی ئەوروپا و چوارەم گەورەترین لە سەر ئاستی جیهان. 

ژمارەكان وادەڵێن: هاوردەی چەک لەلایەن وڵاتانی ئەوروپا، لە ماوەی ساڵانی 2014-2018 و 2019-2023 بە نزیکەیی بووەتە دوو هێندە  بە بەروارد بە هەمان ماوەی پێشتر. نزیکەی 55%ی هاوردەی چەک لە ساڵانی 2019-2023 لە ئەمریکا بووە؛ لە کاتێکدا ئەم ژمارەیە لە ساڵانی 2014-2018 نزیکەی 35% بووە.