پارێزگای هەولێر و تاران ڕێککەوتنێکی نۆ خاڵیان واژۆ کرد

ئاڤا نیوز

 

ماوەی دوو ڕۆژە ئومێد خۆشناو، پارێزگاری هەولێر لە تارانی پایتەختی ئێرانە، دوێنێ دووشەممە لەگەڵ پارێزگاری تاران ڕێککەوتنێکی لێکتێگەیشتن واژۆ کراوە و ناوەرۆکی ڕێککەوتنەکە نۆ خاڵە.

 

وێنە گەورەکە: بەهۆی بوونی سنوورێکی فراوانی هەرێمی کوردستان لەگەڵ ئێران، دەیان ساڵە پەیوەندییەکی پتەوی بازرگانی لەنێوان هەرێمی کوردستان و ئێران هەیە. 

ڕاگەیێنراوی فەرمی: پارێزگای هەولێر ناوەرۆکی ئەو لێکتێگەیشتنەی بڵاوکردەوە کە لەنێوان پارێزگاری هەولێر و محەممەد سادق موعتەمدیان، پارێزگاری تاران واژۆ کراوە.


ئەمە دەقی لێکتێگەیشتنەکەیە:


- ئاسانکاری بۆ پێدانی مۆڵەتی کارکردن بۆ هاووڵاتیانی هەردوو پارێزگا لە کارووباری بازرگانی و بانکیدا.

- بەهێزکردنی ڕاوێژکاریی بازرگانیی ئێران لە هەولێر.

- ئاسانکاری بۆ کاروباری گومرگی، هەولێر لەگەڵ بەغدا هەوڵ بدات بۆ کەمکردنەوەی باجی گومرگی لەسەر کاڵا و بەرهەمە زانستییەکان.

- ئاڵوگۆڕی شاندی بازرگانی، ئەنجامدانی کۆنفرانس و پێشانگا، هەروەها ئاڵوگۆڕی ئاماری بازرگانی و زانیاری لە پێدانی لیستی کەلوپەل و مەرجە پەسەندکراوەکانی هەردوو پارێزگاکە.

- فراوانکردنی هاوکارییەکانی نێوان هەردوو پارێزگا لە بواری هەناردەکردنی خزمەتگوزاریی تەکنیکی و ئەندازیاریی بەتایبەتی لە پیشەسازیی بیناسازیی و دامەزراندن.

- فراوانکردنی هاوکارییەکانی نێوان هەردوو پارێزگا لەبواری گەشتوگوزاریی پزیشکی، هەناردەکردنی خزمەتگوزاریی فێرکاری، پزیشکی و دەرمان، ڕۆشنبیری و وەرزشی نێوان هەردوو پارێزگاکە.

- ڕاگەیاندنی ئامادەیی بۆ ئاڵوگۆڕی زانیاری توێژینەوە و دەستکەوتەکان لە بوارەکانی پیشەسازیی و بایۆتەکنەلۆجی، ئەندازیاری پزیشکی، پڕۆژەی زانستی و نانۆتەکنەلۆژیا، و ئاسانکاری بۆ وەرگرتنی قوتابیانی پارێزگای هەولێر لە پارێزگای تاران.

- ئەنجامدانی کۆبوونەوەی هاوبەشی وەرزی بە هەماهەنگی لەگەڵ بەرپرسانی هەردوو پارێزگای تاران و هەولێر لە ڕێگەی کەناڵە دیپلۆماسییەکان، بە هەماهەنگی کونسوڵخانەی گشتیی کۆماری ئیسلامیی ئێران لە هەولێر و پەیوەندییەکانی حکومەتی هەرێم لەگەڵ ئێران.

- فراوانکردنی ئاڵوگۆڕەکان و جەختکردنەوە لەسەر ڕۆڵی بەشداریکردنی زانیارییە گشتییەکان و ڕێکخراوە ناحکومییەکان.