سێیەمین فێستیڤاڵی "شەل و شەپک" لە زاخۆ دەستی پێکرد

ئاڤا نیوز

زاخۆ بۆ سێیەمین ساڵ باوەش بۆ گەورەترین فێستیڤاڵی هونەری و کولتووری دەکاتەوە و هەموو ڕەنگەکان لە چوار پارچەی کوردستان لە پردی دەلال کۆ دەکاتەوە. فێستیڤاڵەکە دوو ڕۆژ بەردەوام دەبێت.

وێنە گەورەکە: ڕۆژی سێشەممە سێیەمین فێستیڤاڵی 'شال و شەپک' لەژێر ناونیشانی وڵات دایک و کولتوور و ناسنامەیە دەستیپێکرد و ئەمڕۆ دوایین ڕۆژی بەڕێوەچوونی فێستیڤاڵەکەیە.

ئەوەی پێویستە بیزانیت: شوێنی فێستیڤاڵەکە لە گۆڕەپانی پردی دەلالە و تیپە میللییەکانی چوار پارچەی کوردستان لە هەولێر، کەرکووک، ئاماد، بەدلیس، کرماشان، ڕۆژئاوای کوردستان و بەسرا تێیدا بەشدارن، هەروەها بەرزترین ئاڵای کوردستان لە نزیک پردی دەلال هەڵکراوە کە بەرزییەکەی 50 مەتر، درێژی ئاڵاکە 14 مەتر و پانییەکەشی حەوت مەترە.

ئەمەش بزانە: ئەمساڵ فێستیڤاڵەکە لە ساڵانی ڕابردوو جیاوازترە، چونکە جگە لە چالاکیی هونەری و پانێلی زانستیشی تێدا بەڕێوەدەچێت.

زانیاریی زیاتر: زیاتر لە 20 شوێنی تایبەت بە نمایشکردنی جلوبەرگی کوردیی ناوچە جیاوازەکانی کوردستان دانراون، ئەمە جگە لە هەڵدانی ڕەشماڵێکی گەورەی کوردەواری کە زیاتر لە 200 پارچە کەلوپەلی کولتووری و مێژوویی تێیدا پیشاندەدرێن و پێشبینی دەکرێت زیاتر لە 10 هەزار کەس لە ماوەی دوو ڕۆژدا سەردانی فێستیڤاڵەکە بکەن.