پەرلەمانی عێراق فرۆشتنی جگەرە بە کەسانی خوار تەمەن 18 ساڵ قەدەغە دەکات

ئاڤا نیوز

 

لەماوەی دوو ڕۆژدا پەرلەمانی عێراق کۆدەبێتەوە بۆ دەنگدانی کۆتایی لەسەر پێنج پرۆژەیاسا؛ یەکێکیان قەدەغەکردنی فرۆشتنی جگەرەیە بە کەسانی خوار تەمەن 18 ساڵ.

 

وێنە گەورەکە: ڕۆژانی دووشەممە و سێشەممەی هەفتەی داهاتوو پەرلەمانی عێراق دوو کۆبوونەوەی ئاسایی ساز دەکات و 14 بڕگە لە بەرنامەی کاریدا هەیە، لەوانەش دەنگدانی کۆتایی لەسەر پێنج پڕۆژەیاسا کە یەکێکیان تایبەتە بە قەدەغەکردنی فرۆشتنی جگەرە و هاوشێوەکانی بە کەسانی تەمەن خوار 18 ساڵ.

 

ڕاگەیێنراوی فەرمی: سەرۆکایەتیی پەرلەمانی عێراق کارنامەی ڕۆژی دووشەممە و سێشەممەی هەفتەی داهاتووی بڵاوکردەوە، لەو دوو ڕۆژەدا پەرلەمان دەنگدانی کۆتایی دەکات لەسەر پڕۆژەیاساکانی سەندیکای پرۆگرامسازان، تەندروستی دەروونی، پاراستن بەرامبەر زیانەکانی تووتن، هەمواری یاسای هاوتاکردنی بڕوانامە لەگەڵ پەسەندکردنی ڕێککەوتنی بەهێزکردنی وەبەرهێنان لەنێوان عێراق و سعودیە.

 

زانیاریی زیاتر: پەرلەمان 10 پڕۆژەیاسا و بابەتی دیکەش لە بەرنامەی کاریدایە کە پەیوەستن بە پاراستنی مامۆستایان و ژینگە، خوێندنەوەی دووەمیش بۆ پڕۆژەیاسای هەمواری یاسای پەروەردە، پڕۆژەیاسای هەمواری یاسای ئەنجوومەنی نوێنەران و قەرەبووکردنەوەی ئەو کەسانە دەکرێت کە بەهۆی ڕەفتارەکانی ڕژێمی بەعسەوە ئەندامێکی جەستەیان لەدەستداوە.