حەلبووسی بەربژێرێکی نوێ بۆ سەرۆکی پەرلەمان دیاری دەکات

ئاڤا نیوز

محەممەد حەلبووسی بەربژێرێکی نوێ بۆ سەرۆکی ئەنجوومەنی نوێنەرانی عێراق دیاری دەکات، بەربژێرەکە کۆدەنگی زۆربەی لایەنە سوننەکانی لەسەرە و زۆربەی پەرلەمانتارانی کورد و شیعەش ئامادەن دەنگی پێدەن.

وێنە گەورەکە: دوای دوورخستنەوەی محەممەد حەلبووسی له‌ مانگی 11ی ساڵی 2023 ەوە، ئه‌نجوومه‌نی نوێنه‌ران عێراق بێ سەرۆکە،  پۆستەکە بەرکەوتەی پێکهاتەی سوننەیە و  کاریش بۆ ئەوە دەکرێت هەر لای هاوپەیمانیی تەقەدوم بمێنێتەوە.

چی ڕوودەدات: لایەنەکانی سوننە کار لەسەر هەموارکردنەوەی پەیڕەوی ناوخۆی ئەنجوومەنی نوێنەران دەکەن و بۆ ئەم مەبەستە بە زۆرینەی ده‌نگ بڕگەیەک بۆ دانیشتنی داهاتوو  زیادکراوە، هەموارەکە دەرچەیەک بۆ چارەسەرکردنی کێشەکە دەکاتەوە، دەرگای خۆپاڵاوتن سەرلەنوێ دەکرێتەوە بۆ ئەوەی لایه‌نه‌كان بتوانن کاندیدەکانیان بگۆڕن. 

زانیاریی تایبەت: ئاڤا نیوز زانیویەتی لایەنەکانی سوننە کار لەسەر بەربژێرێک دەکەن لە هاوپەیمانیی تەقەدووم بێت بەسەرۆکایەتیی حەلبووسی. زیاد جەنابی، سەرۆکی ئێستای لیژنەی دەستپاکی ئەو کەسەیە کۆدەنگی زۆربەی لایەنەکانی لەسەرە.

لێدوانی فەرمی: ئامانج هەرکی، پەرلەمانتاری کورد لە فراکسیۆنی پارتی بە ئاڤا نیوزی گوت: ڕاسپاردەی سەرۆک بارزانییە لەنێو سوننە چ بەربژێرێک بۆچوونی زۆرینەی لەسەر بێت دەنگی پێبدەین، بەهەمانشێوە زۆربەی پەرلەمانتارانی شیعە لەگەڵ ئەو بۆچوونەدان.

باکگراوند: پێشتر کاندیدی حەلبووسی شەعلان کرەیم بوو، بەڵام بەهۆی کێبڕكێی بەهێزی لەگەڵ  سالم عیساوی کە لەلایەن خه‌میس خه‌نجه‌ر، سه‌رۆكی هاوپه‌یمانیی سیاده‌ پشتگیری دەکرێت، تاوەکو ئێستا پرسەکە بە هەڵواسراوی ماوەتەوە.