پسپۆڕێکی ژینگەیی بۆ عێراقییەکان: خۆتان بۆ گەرمایەکی تاقەتپڕوکێن ئامادە بکەن

ئاڤا نیوز

 

پسپۆڕێکی ژینگەیی دەڵێت، ئەمساڵ و ساڵانی داهاتووش پلەکانی گەرما لە عێراق 50 پلەی سیلیزی تێدەپەڕێنێت، ئەوەش مانای وایە خەڵک دەبێت خۆی بۆ شەپۆلی گەرمای تاقەتپڕوکێن ئامادە بکات، بۆ چارەسەری ئەو کێشەیەش چەند پێشنیازێک دەخاتەڕوو.

 
ئەوەی پێویستە بیزانیت: بەگوێرەی نەتەوەیەکگرتووەکان عێراق یەکێکە لەو پێنج وڵاتەی جیهان کە زۆرترین کاریگەری گۆڕانی کەشوهەوای لەسەرە، زیادبوونی ڕووبەری بەبیابانبوون و شەپۆلەکانی خۆڵبارینیش دەرئەنجامی گۆڕانکارییەکانن.

 

لێدوانی فەرمی: د.قوسەی فازڵ، پسپۆڕی نێودەوڵەتی تایبەت بە ژینگە لە نەتەوەیەکگرتووەکان ڕایگەیاند، وەک دەرئەنجامی گۆڕانی کەشوهەوا لە ساڵانی داهاتوودا پلەکانی گەرما زیاتر بەرزدەبنەوە، بۆیە دەبێت لەگەڵ ئەم دۆخەدا خۆگونجاندن بکرێت.

 

زانیاریی زیاتر: بەوتەی ئەو پسپۆڕە، باشترین شێوازی خۆگونجاندن ئەوەیە لەکاتی دروستکردنی ماڵەکاندا و بەتایبەتیش لەو بەشەی زۆرترین کات خۆری لێدەدات، دوو ڕیز دیوار بەرزبکرێتەوە و نێوانیان بە ماددەی دژەی گواستنەوەی گەرمی پڕبکرێتەوە، ئەم شێوازەش پلەی گەرمی ماڵەکان دادەبەزێنێت و بەکارهێنانی کارەباش کەمتر دەکاتەوە.

 

ئەمەش بزانە: لە عێراق پلەکانی گەرما بەخێرایی بەرزدەبنەوە و لە جیهانیشدا ئەم بابەتە مەترسیی دروستکردووە، بۆیە داوا لە حکومەتەکان، کەرتی تایبەت و کۆمەڵگاکان کراوە زیاتر پشت بە وزەی نوێ و چارەسەری بیرۆکەی بەردەوام و دۆستی ژینگە ببەستن.