عێراق بۆ دابینکردنی مووچە قەرز دەکات

ئاڤا نیوز

 

وەزارەتی دارایی عێراق کێشەی دابینکردنی پارەی نەختینەیی بۆ خەرجکردنی مووچەی مووچەخۆران هەیە و لەپێناو پڕ کردنەوەی ئەو کورتهێنانەش پەنا دەباتە بەر قەرزکردن لە پارەی دانراوی باج(ئەمینداریەتیی باج).

 

نووسراوی فەرمی: بەگوێرەی بەڵگەنامەیەکی ئەنجوومەنی وەزیران، لە دانیشتنی 15-04-2025ی ئەنجوومەنی وەزیران، وەزارەتی دارایی سەرپشک کردووە لەپێناو دابینکردنی مووچەی مانگی نیسان و مانگەکانی دیکەی مووچەخۆران؛ بەجۆرێک بڕی سێ تریلیۆن و 45 ملیار و حەوت ملیۆن و 500 هەزار و 252 دینار لە ئەمینداریەتی باجەکان ڕابکێشێت.

 

لەلایەکی دیکە؛ فوئاد حوسێن، وەزیری دەرەوەی عێراق لە پەراوێزی سەردانەکەی بۆ واشنتن بە ڕۆژنامەنووسی ڕاگەیاند: دۆخی دارایی عێراق کێشەی هەیە کە پەیوەستە بە دابەزینی نرخی نەوتەوە و هەوڵ دەدەین کێشەکان چارەسەر بکەین.

 
ئەوەی پێویستە بیزانیت: زیاتر لە 90٪ی داهاتی گشتیی پشت بە فرۆشتنی نەوت دەبەستێت، بەگوێرەی "پلانی گەشەپێدانی نیشتمانیی 2024-2028 " حکومەتی عێراق، پێشبینی دابەزینی ڕێژەی داهاتی نەوت دەکات لە 89.2٪ لە ساڵی 2024 بۆ 87.4٪ بۆ ساڵی 2028.