ئاڤا زانیاری لەبارەی چۆنیەتی مامەڵەکردن بە گۆشتی ئەو ئاژەڵە کێوییانەی ڕاوکراون دەخاتە ڕوو

ئاڤا نیوز

سەبارەت بە گۆشتی ئەو ئاژەڵە کێوییانە ڕاوکراون و  دەکەونە بەردەستی پۆلیسی دارستان و ژینگە، بەڕێوەبەری ڕاگەیاندنی پۆلیسی دارستان و ژینگەی پارێزگای سلێمانی دەڵێت، 'گۆشتەکەی بۆ فرۆشتن دەخرێتە مەزادەوە'.

چیرۆکی سەرەکی: خەڵکێکی زۆر پرسیار لەبارەی گۆشتی ئەو ئاژەڵ و باڵندە کێوی و ماسییە ڕاوکراوانە دەکەن کە دەست تیمەکانی پۆلیسی دارستان و ژینگە دەکەون، دەپرسن ئایا ئەم گۆشتە خۆیان دەیخۆن یان دەیفرۆشن و پارەکەی دەبەن، یان چی لێ دەکەن؟، ئاڤا بەدواداچوونی بۆ وەرگرتنی زانیاری لەمبارەیەوە کرد.

لێدوانی سەرەکی: عەمید هێمن کەمەرخان، بەڕێوەبەری ڕاگەیاندن لە بەڕێوەبەرایەتی پۆلیسی دارستان و ژینگەی پارێزگای سلێمانی، بە ئاڤا میدیای ڕاگەیاند: ئەگەر ماسی و کەڵە کێوی و باڵندەی کێوی بە زیندوویی کەوتنە دەستی تیمەکانمان ئەوا ئازاد دەکرێن.

- ئەگەر ئاژەڵەکە یان باڵندە و ماسیەکە برینداربن و بەکەڵکی خواردن بێن، ئەوا دەکرێن بە دۆسیە و دەبرێنە پێشی دادوەر، دواجار دادوەر بڕیار دەدات و لە ڕێی لیژنەیەکەوە دەسەلمێنرێت کە گۆشتەکەیان بەکەڵکی خواردن دێت، بۆیە هەر لەلایەن لیژنەکەوە دەخرێتە مەزادەوە و گۆشەکە لەو سنوورەی ڕاوکراوە دەفرۆشرێت.

- داهاتی گۆشتی ئاژەڵ و باڵندەی کێوی و ماسی و ئەو کەلوپەلانەش لە کاتی ڕاوکردندا دەستیان بەسەردا دەگیرێت، بە پسولەی فەرمی دەگەڕێنرێتەوە بۆ حکومەت.

ئەوەی پێویستە بیزانیت: بەگوێرەی جۆر و شێوازی ڕاوکردنی ئاژەڵ و باڵندە کێوییەکان، سزای سەرپێچیکار لەلایەن دادوەرەوە دیاری دەکرێت، هەروەها سزاکانیش بەندکردن و پێبژاردن دەبن.