یەكەم كاروانی حاجیانی كوردستان بەرەو سعوودیە بەڕێ دەكەون

ئاڤا نیوز

سەرۆكی شاندی حاجیانی هەرێمی كوردستان ئاشكرای دەكات، ڕۆژی 16ـی ئایاری 2025، یەكەم كاروانی حاجیانی كوردستان بەرەو سعوودیە بەڕێ دەكەون.

وێنە گەورەكە: ئەمساڵ پێنج هەزار و 136 هاووڵاتیی هەرێمی كوردستان بەشداری لە بەجێگەیاندنی فەریزەی حەج دەكەن، لە 16ـی مانگی ئایارەوە، گەشتە وشكانی و ئاسمانییەكانی هەرێمی كوردستان بەرەو سعوودیە دەستپێدەكات و گەشتەكان تاوەكو 28ـی هەمان مانگ بەردەوام دەبێت، وەزارەتی ئەوقاف و كاروباری ئایینی هەرێمی كوردستانیش لەسەر ڕاسپاردەی سەرۆكوەزیران مەسرور بارزانی، لەچوارچێوەی پاڵپشتیی پرۆسەی حەج و عومرە، بڕی چوار ملیار و 200 ملیۆن دیناری دابینكردووە بەمەبەستی كەمكردنەوەی تێچووی حەج لەسەر هاووڵاتیان.

لێدوانی فەرمی: شێخ نیاز راغب نەقشبەندی، سەرۆكی شاندی حاجیانی كوردستان تایبەت بە ئاڤا ڕایگەیاند، هەموو ئامادەکارییەکیان بۆ پێشوازیکردن لە وەرزی حەجی ئەمساڵ کردووە و  هەوڵدەدەن باشترین خزمەت پێشکەش بە حاجیانی کوردستان بکەن.

ڕوونیشی كردەوە، گەشتە وشكانییەكان لە 16ـی ئایار و گەشتە ئاسمانییەكان لە 19ـی هەمان مانگ دەستپێدەكەن و تاوەكو 28-5-2025، بەردەوام دەبێت.

ئەوەی پێویستە بیزانیت: لە ڕۆژی 16و17-5-2025، حاجیانی کوردستان بەرێگای وشکانی بەرێ دەکەون کە ژمارەیان هەزار و 645 كەسە و ڕۆژی 19ـی هەمان مانگیش، یەکەم کاروانی حاجیانی کوردستان بەرێگەی ئاسمانی لەڕێگەی هەردوو فرۆکەخانەی نێودەوڵەتیی هەولێر و سلێمانی بەرەو سعوودیە بەرێ دەکەون کە ژمارەیان سێ هەزار و 491 حاجیە.

ئەوەش بزانە: گەشتی وشکانی بە دوو ڕۆژ دەبێت، بەجۆرێک حاجیانی (پارێزگای سلێمانی و پارێزگای هەڵەبجە و هەردوو ئیدارەی سەربەخۆی ڕاپەرین و گەرمیان)، لەڕۆژی 16-5-2025، گەشت دەكەن و حەجخوازانی (پارێزگاكانی هەولێر و دهۆک و ئیدارەی سەربەخۆی سۆران و زاخۆ)، لەڕۆژی 17-5-2025 بەرەو عەرەبستانی سعوودیە بەڕێ دەكەون.