لە سلێمانی 50%ی هاوبەشانی پڕۆژەی ڕووناکی تەنیا 17 هەزاریان بۆ هاتووەتەوە

ئاڤا نیوز

 

حكومەتی هەرێمی كوردستان بەردەوامە لە فراوانكردنی پڕۆژەی كارەبای 24 كاتژمێری و ئامانجە ئەوەیە كە تاوەكو چەند مانگێكی دیكە تەواوی دانیشتووانی هەرێمی كوردستان ببنە خاوەنی كارەبای بەردەوام.

 

وێنە گەورەکە: پڕۆژەی ڕووناکی  یەکێکە لە پڕۆژە ستراتیژی و گرنگەکانی کابینەی نۆیەم، ئامانجەكەی نەهێشتنی مۆلیدەی گەڕەكەكان و دابینكردنی كارەبای 24 كاتژمێرییە بۆ دانیشتووانی هەرێمی كوردستان، هاووڵاتی بەپێی بڕی بەكارهێندراوی كارەبای ماڵەكەی پارە دەدات.

 

ڕاگەیێنراوی فەرمی: وەزارەتی كارەبا ڕایگەیاند: جێگەی خۆشحاڵییە کە نیوەی هاووڵاتیانی شاری سلێمانی کە کارەبای 24 کاتژمێرییان پێ گەیشتووە، بۆ مانگی 4 کەمتر لە 17 هەزار دیناریان بۆ هاتووەتەوە پاش پاڵپشتی 50% لەسەر پسوولەکەیان.

 

ئەوەی پێویستە بیزانیت: تا ئێستا لەسەرانسەری هەرێمی كوردستان 570 هەزار هاووڵاتی كارەبای 24 كاتژمێرییان بۆ دابینكراوە و نزیكەی 729 مۆلیدەی تایبەت لە 43 گەڕەك وەستێنراون كە كاریگەرییەكەی لەسەر ژینگە یەكسانە بە 126 هەزار ئۆتۆمبێل لەڕووی دەردانی گازی ژەهراوی.