بڕی 100 ملیار دینار بۆ شەش مووچە بنەڕەتییەکەی خانەنشینان تەرخان دەکرێت

ئاڤا نیوز

داوا ئەکرێ بڕی 100 ملیار دینار بۆ شەش مووچە بنەڕەتییەکەی خانەنشینان تەرخان بکرێت کە ئەمە تەواو بوو ئەو کاتە کار لەسەر دابەشکردنی 12 مووچەکەی ئیکرامییە دەکرێ، مینحە 100 هەزارەکەش تا ئێستا سوودای ئیمزای لەسەر نەکردووە، تاوەکو دەستپێبکاتەوە.

زانیاریی تایبەت: بەپێی زانیارییەكانی ئاڤا میدیا، ژمارەی خانەنشینانی هەرێمی كوردستان نزیك دەبێتەوە لە 400 هەزار کەس، ئەمەش نزیك دەبێتەوە لە نیوەی ژمارەی فەرمانبەران.

ئەوەی پێویستە بیزانیت: حكومەتی هەرێمی كوردستان سەرقاڵی ئەوەیە هەیكەلی ئیدارەدانی خانەنشینی گەورەتر بكات، بۆ ئەوەی بتوانێت كاروبارەكانی ئەو ژمارە زۆرەی خانەنشینان باشتر ڕاپەڕێنێت.

لێدوانی فەرمی: سەبارەت بە خەرجكردنی ئیكرامییەی خانەنشینان، 12 مووچەی تەواو و شەش مووچەكەی بنەڕەتی، سەرچاوەیەك لە وەزارەتی دارایی هەرێمی كوردستان بە ئاڤای ڕاگەیاند، ڕێككارەكانی شەش مانگەكە ئامادە كراوە و خەزێنەكان ڕێوشوێنی پێویستیان گرتووەتەبەر، "داوامان كردووە پارەكە تەرخان بكرێت كە زیاتر لە 100 ملیار دینارە، جارێ ئەوە وەردەگرین و دابەشی دەكەین، ئەمە ئەو فەرمانبەرانە دەگرێتەوە کە شەش مانگ مۆڵەتی کۆکراوەیان هەیە و خزمەتیان زیاتر لە 15 ساڵە".

- یەک دوو مانگیشە لە سلێمانی و هەندێ شوێنی دیکە دەست بە دابەشکردنی کراوە، بەڵام حکومەت دەیەوێ بە ماوەیەکی کەم هەمووی تەواو بکات. دواتر كار لەسەر خەرجکردنی 12 مووچەکەی ئیکرامییە دەکرێت.

لەلایەکی دیکەوە: سەبارەت بە 100 هەزار دینارەكەی خانەنشینانیش ئەو سەرچاوەیە گوتی، تاوەكو ئێستا ڕەزامەندیی محەممەد شیاع سوودانی، سەرۆكوەزیرانی عێراق، بۆ خانەنشینانی هەرێمی كوردستان نەگەڕاوەتەوە، "ئەگەر بەغدا بڕیار بدات، ئەو لەگەڵ لیستی مووچەی مانگی پێنج ئەمەش زیاد دەكەین" کە بۆ هەر خانەنشینێك ئەگەر مووچەکەی لە ملیۆنێک کەمتر بێت 100 هەزاری پێدەدرێ و لە مانگی یەکیشەوە قەرەبوو دەکرێنەوە.