یەکەم تووشبووی تای خوێنبەربوون لە واست ڕادەگەیێنرێت

ئاڤا نیوز

سەرچاوەیەکی پزیشکی لە فەرمانگەی تەندروستیی واست یەکەم حاڵەتی تووشبوونی تای خوێنبەربوونی تۆمارکرد.

وێنە گەورەکە: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، نیشانەکانی نەخۆشییەکە لەماوەی سێ بۆ 14 ڕۆژدا دەردەکەوێت، گرنگترینیان بریتییە لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست.

زانیاریی بەدەستهاتوو: سەرچاوەیەکی پزیشکی بە میدیا عێراقییەکانی ڕاگەیاند: نەخۆشخانەی ناوەندی قەزای نوعمانییە لەپارێزگای واسیت بە فەرمی یەکەم حاڵەتی تای خوێنبەربوونی تۆمارکرد.

ئەو سەرچاوەیە ئاماژەی بەوەشکرد، تووشبووەکە پیاوێکی دانیشتووی شارۆچکەی نوعمانییەیە و ڕێوشوێنی تەندروستی بۆ چارەسەرکردنی گیراوەتەبەر.

ئەوەی پێویستە بیزانیت: بە گوێرەی تازەترین ئاماری وەزارەتی تەندروستی عێراق، ژمارەی تووشبووان بەتای خوێنبەربوون گەیشتووەتە 28 حاڵەت، چوار تووشبووش گیانیان لەدەستداوە.