ڕاویژکارێکی سوودانی هۆکاری دواکەوتنی یاسای بودجە دەخاتە ڕوو

ئاڤا نیوز

ڕاوێژکاری دارایی سەرۆکوەزیرانی عێراق هۆکاری دواکەوتنی یاسای بودجە ئاشکرا دەکات و دەڵێت، دواکەوتنی بودجەی گشتیی ئەمساڵ دەگەڕێتەوە بۆ هەموارکردنەوەی بڕگەی (ج) ماددەی 12 لە یاسای بودجە.

وێنە گەورەکە: بەگوێرەی هەمواری بڕگەی (ج) ماددەی 12 لە یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، تاوەکو ئەو کاتەى لایەنێکى نێودەوڵەتیی ڕاوێژکاری، نرخێکى خەمڵێندراو دیاری دەکات، دەبێت هەرێمى کوردستان ڕۆژانە 400 هەزار بەرمیل نەوت ڕادەست بکات.

لێدوانی فەرمی: مەزهەر محەممەد ساڵح، ڕاوێژکاری دارایی محەممەد شیاع سوودانی، سەرۆکوەزیرانی عێراق ڕایگەیاند:  لە ئەنجامی مەرجی هەڵسەنگاندنی تێچووی دەرهێنان و گواستنەوەی نەوتی هەرێمی کوردستان کە تاوەکو ئێستا ڕێککەوتنی لەسەر نەکراوە، حکومەت یاسای بودجەی ساڵی 2025 پێشکەشی پەرلەمان نەکردووە.

ئاماژەی بەوەشکرد، لەگەڵ ئەوەی پەرلەمان داوای خشتەی بودجەی ئەمساڵ دەکات، بەڵام حکومەت بەردەوامە لەجێبەجێ کردنی پڕۆژەکان کە بە شێوەیەکی ئاسایی بەرەوپێش دەچن و قەرزکردنیش لە بازاڕی ناوخۆیی ئاساییە بۆ دابینکردنی مووچەی فەرمانبەران و کرێی چاودێری کۆمەڵایەتی و خەرجییەکانی پڕۆژەی وەبەرهێنان.