لە كەركووك تەرمی شۆفێرێكی تاكسی بە كوژراوی دەدۆزرێتەوە

ئاڤا نیوز

دوای ڕۆژێك لە بێسەروشوێنبوونی شوفێرێكی تاكسی لە كەركووك، ئەمڕۆ تەرمەكەی لە خانووێكی تەواونەكراوی شارەكە، بە كوژراوی دۆزرایەوە.

چیرۆكی سەرەكی: مام عەلی، شۆفێری تاكسییە لە شاری كەركووك، لەدوای نیوەڕۆی دوێنێ پێنجشەممەوە دیارنامێنێت، ئەمڕۆ هەینی 2025-05-02، تەرمەكەی بە كوژراوی لە خانووێكی تەواونەكراوی گەڕەكی شۆراو لە شاری كەركووك، دۆزراوەتەوە، ئەوەش لەكاتێكدا دوێنێ پۆلیسی شارەكە تۆمەتباری ئەو كەیسەیان دەستگیركردووە.

زانیاریی تایبەت: دیار محەممەد، پەیامنێری ئاڤا لە كەركووك شەوی ڕابردوو ڕایگەیاند، 'مام عەلی' دوێنێ پێنجشەممە سەعات 12ـی نیوەڕۆ پەیوەندیی بە ماڵەوەیان كردووە و پێی وتوون: "بە تاكسی دەردەچم نەفەرێك دەگەیەنمە شۆراو". دوای كاتژمێرێك لەو پەیوەندییە تەلەفۆنییە، خەتی نەماوە و هێڵەكەشی داخراوە، ئەو كەسەی كە بەنیازبووە بیگەیەنێتە شۆراو، ئۆتۆمبێلەكەی كە جۆری نیسان سەنی بووە بردوویەتی بۆ پێشەنگاكانی ئۆتۆمبێل تا بیفرۆشێت، لەوێ كەسێك ئۆتۆمبێلەكەی ناسیوەتەوە و وتوویەتی ئەمە ئۆتۆمبێلەكەی مام عەلیە بۆچی لەلای تۆیە، كەسەكە وتوویەتی بە منی داوە تا بۆی بفرۆشم، فۆتۆكۆپی ناسنامە و بەڵگەنامەكانی مام عەلیشی لەلا بووە.

زانیاریی زیاتر: دوای گومانكردن لە بابەتەكە، پۆلیسی كەركووك هەر لە پێشانگاكانی ئۆتۆمبێل دەستگیری دەكات، تۆمەتبارەكە شوێنی شاردنەوەی تەرمەكە بۆ هێزەكانی پۆلیس ئاشكرا دەكات.