وەزارەتی تەندروستی ڕێنمایی بۆ دووربوون لە تای خوێنبەربوون بڵاودەكاتەوە

ئاڤا نیوز

وەزارەتی تەندروستی حکومەتی هەرێمی کوردستان 9 ڕێنمایی گرنگ بۆ دووربوون لە نەخۆشیی تای خوێنبەربوون بڵاودەكاتەوە، كە پێویستە لەكاتی سەربڕینی ئاژەڵ بەشێوەیەكی زانستییانە جێبەجێ بكرێن.

وێنە گەورەكە: تا دێت مەترسیی نەخۆشی تای خوێنبەربوون لەسەر عێراق زیاتر دەبێت و تا ئێستا 30 حاڵەتی تووشبوون لە سەرانسەری عێراق تۆماركراوە و پێنج كەسیش بەهۆیەوە گیانیان لەدەستداوە، ئەمڕۆش لە هەرێمی كوردستان یەكەم حاڵەتی تووشبوون بە نەخۆشییەكە لە شارۆچكەی كۆیە تۆماركرا.

ڕاگەیێنراوی فەرمی: وەزارەتی تەندروستی ڕایگەیاندووە، بۆ دووربوون لە نەخۆشیی تای خوێنبەربوون، پێوستە لە کاتی سەربڕینی ئاژەڵ ئەم ڕێنماییە زانستییانە جێبەجێ بکرێن:

یەكەم: سەربڕینی ئاژەڵ پێویستە لەناو ئەو سەربڕینخانانەدا بێت کە ڕێگەپێدراون و پزیشکی ڤێنتەرنەری سەرپەرشتی دەکات.

دووەم: لەکاتی سەربڕینی ئاژەڵ و کەوڵکردن یان پارچەپارچەکردنی گۆشتەکەیان، جلوبەرگی خۆپارێزی وەک: دەستکێش، جزمە، بەرگی تایبەت، ماسکی دەموچاو بەکار بهێنرێن.

سێیەم: نابێت خێزان یان خەڵک لە چواردەوری قەساب کۆببنەوە و هاوکاریی بکەن.

چوارەم: بەبێ دەستکێش مامەڵەکردن لەگەڵ کەلاش  نەکرێت و دوای پۆشینی دەستکێش و کەلوپەلی خۆپارێزی گۆشتەکە پارچەپارچە بکرێت و پاشان دەستەكان بەباشی بشۆردرێت.

پێنجەم: لابردنی پاشماوەی ئاژەڵە سەربڕاوەکان و دانانی کیسی داخراو و فڕێدانی بۆ شوێنی تایبەت.

شەشەم: بەکارهێنانی چەقۆ و تەختەی پارچەپارچەکردنی تایبەت بە گۆشت و پاکژکردنەوەی تەختە و چەقۆکان دوای بەکارهێنان.

حەوتەم: پاککردنەوەی ئەو شوێنەی ئاژەڵەکەی لێ سەر دەبڕدرێت، بەتایبەت ئەو شوێنانەی خوێنی لێیە، پێویستە بە ماددەی کلۆرین پاک بکرێنەوە.

هەشتەم: باشتر وايە گۆشت دواى سەربڕينى ئاژەڵ بۆ ماوەى نيو كاتژمێر لە پلەى (4 - 8) پلەى سەدى هەڵبگيرێت، پاشان بەكار بهێنرێت. بەڵام گۆشتی کوڵاو هیچ کێشەی نییە و نابێتە هۆی توشبوون بە نەخۆشیی تای خوێنبەربوون.

نۆیەم: ئەگەر ئاژەڵ گەنە يان مێرووى ترى هەبوو باشتر وايە سەرنەبڕدرێت.