بەهۆی تای خوێنبەربوون کوشتارگەی کۆیە دادەخرێت

ئاڤا نیوز

بۆ ڕێگری لە تای خوێنبەربوون،  بڕیاردرا بۆ ماوەیەکی نادیار کۆشتارگەی کۆیە دابخرێت.

وێنە گەورەکە: تای خوێنبەربوون نەخۆشیەکی ڤایرۆسییە لە ئاژەڵەوە بە چەند ڕێگایەک بۆ مرۆڤ دەگوازرێتەوە، دیارترینیان لەڕێگای بەرکەوتن بە ئاژەڵێکی تووشبووە.

لێدوانی فەرمی: د.خەیروڵڵا خدر، بەڕێوەبەری کوشتارگەی کۆیە بە ئاڤا میدیای ڕاگەیاند، بەهۆی تووشبوونی کەسێک لە کۆیە بە تای خوێنبەربوون و بۆ خۆپارێزی لە تووشبووی زیاتر، بڕیارماندا کوشتارگەی کۆیە تا کاتێکی نادیار دابخەین.

زانیاریی زیاتر: بەگوتەی بەڕێوەبەری کوشتارگەی کۆیە، لە کوشتارگەکەیان هیچ ئامێرێکی پشکنینی پێشوەختەیان نییە، ئەو کاتەی ئاژەڵ سەردەبڕدرێت بە چاو و سەیرکردن پشکنینی بۆ دەکرێت، ئەمەش ڕێگایەکی گونجاو نییە.

باکگراوند: ئەمڕۆ هەینی وەزارەتی تەندروستی حکومەتی هەرێمی کوردستان یەکەم حاڵەتی تووشبووی تای خوێنبەربوونی ڕاگەیاند کە گۆشتفرۆشێکی تەمەن 42 ساڵەی دانیشتووی کۆیە بوو، ئێستا لە نەخۆشخانەیەکی هەولێر چارەسەر وەردەگرێت.