دوو سزادراوە هەڵاتووەکەی زیندانی حیللە دەستگیرکرانەوە

ئاڤا نیوز

هێزە ئەمنییەکانی پارێزگای بابل، توانیان ئەو دوو سزادراوە هەڵاتووە دەستگیر بکەنەوە کە لە زیندانی کۆنی حیللە هەڵاتبوون.

 

چیرۆکی سەرەکی: ڕۆژی هەینی دوو سزادراو کە یەکێکیان سزای حەوت ساڵ زیندانی بەسەردا سەپێنرابوو بە تاوانی ماددە هۆشبەرەکان، سزادراوی دووەمیش بە تۆمەتی دزیکردن سزای شەش مانگ زیندانی بەسەردا سەپێنرابوو، توانیان لە زیندانی حیللە هەڵبێن.

 

ڕاگەیێنراوی فەرمی: وەزارەتی ناوخۆی عێراق ڕایگەیاند، هێزە ئەمنییە هاوبەشەکان لە ماوەی چەند کاتژمێرێکدا توانیان هەردوو هەڵاتووەکەی زیندانی کۆنی حیللە دەستگیر بکەنەوە.

 

لێدوانی ڕۆژنامەوانی: خالید شوانی، وەزیری دادی عێراق دوای دەستگیرکردنەوەی دوو سزادراوەکە لە کۆنگرەیەکی ڕۆژنامەوانیدا پێکهێنانی لیژنەیەکی هاوبەشی لە وەزارەتەکانی ناوخۆ و داد لەسەر ڕاسپاردەی سەرۆکوەزیرانی عێراق  ڕاگەیاند بۆ بەدواداچوون لەسەر ڕووداوەکە و ئاماژەی بەوەشکرد، "لیژنەکە دەستیکردووە بە ئەرکەکانی و کۆمەڵێک ڕێوشوێنی گرتووەتەبەر، ئەنجامی کۆتایی لێکۆڵینەوەکەش دوای تەواوبوونی ڕادەگەیەنرێت".

 

ئەوەی پێویستە بیزانیت: چاکسازیی حیللە لە ژێر دەسەڵاتی وەزارەتی داددایە بە هەموو وردەکارییەکانییەوە، تەنانەت پاسەوانەکانیش سەر بە وەزارەتەکەن و وەزارەتی ناوخۆ هیچ دەسەڵاتێکی بەسەردا نییە.

 

کاریگەریی و لێکەوتەکان: هەر لەسەر ئەو ڕووداوە وەزیری دادی عێراق هەریەک لە بەڕێوەبەری چاکسازیی حیللە و یاریدەدەرەکەی لە پۆستەکانیان دوورخستنەوە.