ئاکسیۆس: ئەمریکا و ئیسرائیل لە ڕێککەوتنی گەیاندنی هاوکاری بۆ غەززە نزیکن

ئاڤا نیوز

 

ئاکسیۆس بە پشت بەستن بە چەند سەرچاوەیەک ئاشکرای دەکات، ئەمریکا و ئیسرائیل و نوێنەرانی ڕێکخراوێکی نێودەوڵەتی نزیکن لە گەیشتن بە ڕێککەوتن لەسەر چۆنیەتی دەستپێکردنەوە و گەیاندنی هاوکارییە مرۆییەکان بۆ غەززە.

 

وێنە گەورەکە: لە سەرەتای مانگی ئازارەوە و لەگەڵ دەستپێکردنەوەی هێرشەکانی ئیسرائیل بۆ سەر کەرتی غەززە، ڕێگری لە چوونە ژوورەوەی هەموو هاوکارییەکی مرۆیی  و پێداویستی سەرەتایی لەلایەن ئیسرائیلەوە بۆ ناو کەرتەکە کراوە، بەهۆیەوەش دۆخی مرۆیی ناوچەکە بەرەو خراپی چووە.

 
زانیاریی بەدەستهاتوو: ماڵپەری ئاکسیۆسی ئەمریکی لە زاری دوو بەرپرسی ئیسرائیلی و بەرپرسێکی ئەمریکی لە ڕاپۆرتێکدا ئاشکرایکردووە، ئەمریکا و ئیسرائیل و نوێنەرانی ڕێکخراوێکی نێودەوڵەتی نزیکن لە گەیشتن بە ڕێککەوتن لەسەر چۆنیەتی دەستپێکردنەوەی گەیاندنی یارمەتییە مرۆییەکان بۆ غەززە، بەبێ ئەوەی حەماس بتوانێت ئەم هاوکارییانە کۆنتڕۆڵ بکات.

 

کاریگەری و لێکەوتەکان: ئیسرائیل هۆکاری ڕاگرتنی ئەم هاوکارییانەی گەڕاندەوە بۆ ئەوەی کە ئەم هاوکارییانە بوونەتە سەرچاوەی داهات بۆ حەماس و بەهۆیەوە سەرچاوەیەکی باشی دارایی پەیدا دەکرد. 

 

لەلایەکی دیکەوە: دۆناڵد ترەمپ، سەرۆکی ئەمریکا پێشتر ئاماژەی بەوەکردبوو، لەگەڵ نەتانیاهۆ ئەم پرسەی تاوتوێی کردووە، کە پێویستە ڕێگە بە چوونەژوورەوەی هاوکارییەکان بۆ ناو غەززە بدات.