كەشناسی: ئەمڕۆ پلەكانی گەرما نزیكەی چوار پلە نزم دەبنەوە

ئاڤا نیوز

 

بەڕێوەبەرایەتیی كەشناسیی هەرێمی كوردستان ئاشكرای دەكات، ئەمڕۆ لە چەند شوێنێکی جیاجیای هەرێمی كوردستان تاوەباران دەبارێت و پلەكانی گەرماش نزم دەبنەوە.

 

ڕاگەیێنراوی فەرمی: كەشناسیی هەرێمی كوردستان ڕایگەیاند: ئەمڕۆ ئاسمان لە زۆرینەی کاتەکاندا هەوری تەواو دەبێت، لەگەڵ بارینی تاوەباران لە کات و شوێنی جیاجیا هەندێكجار هەورە بروسکەشی لەگەڵدا دەبێت و پلەكانی گەرماش نزیكەی چوار پلە نزم دەبنەوە بەراورد بە تۆماركراوەكانی دوێنێ.

 

زانیاریی زیاتر: بەپێی ڕاگەیێنراوەكەی كەشناسیی  هەرێمی كوردستان، سبەی یەكشەممە ئاسمان هەوری تەواو دەبێت لەگەڵ بارینی تاوەباران لە كات و شوێنی جیاجیا و هەندێكجار هەورەبروسكەیشی لەگەڵدا دەبێت و پلەكانی گەرماش نزیك دەبنەوە لە تۆماركراوەكانی ڕۆژی پێشووتر.

 

لێدوانی فەرمی: شێخ دارا پێشکەشکاری کەشوهەوای ئاڤا ڕایگەیاند، خۆڵبارین ئەمساڵ بەردەوام دەبێت، بەڵام لە هەرێمی کوردستان کەمترە بەراورد بە ناوچەکانی عێراق، ئەگەری بارانبارینیش بەهێزە لە مانگی پێنج.

 

لەلایەكی دیكەوە: چەند ڕۆژێكە شەپۆلێكی خۆڵبارین عێراق و هەرێمی كوردستانی گرتووەتەوە، لەمبارەیەوە عامر جابری، گوتەبێژی دەستەی گشتیی کەشناسی و چاودێریی بومەلەرزەی عێراق هۆکاری ئەم شەپۆلە خۆڵبارینەی بۆ ئاڤا میدیا ڕوونکردەوە و ڕایگەیاند: گۆڕانکاریی کەشوهەوا، کەمی ڕێژەی بارانبارین، کاریگەری زریانی تۆز و با کە لە باکووری ئەفریقیاوە ڕوو لە عێراق دەکات و خێرایی با لە بیبانەکان، وادەکات تۆز و خۆڵ لە ناوچەکانی ناوەڕاست و باشوور بەرز ببێتەوە، ئەمەش هۆکاری سەرەکی ئەم شەپۆلە چڕەی خۆڵبارینە لە زۆربەی ناوچەکانی عێراق.