لە ئێران بەهۆی ڕەشەبا و هەورەبرووسکە حەوت کەس گیانیان لەدەست دەدەن

ئاڤا نیوز

 

بەهۆی هەورەبرووسکە و نالەباریی کەشوهەوا لە چەند شارێکی ئێران، حەوت کەس گیانیان لەدەست داوە و 67 کەسی دیکەش برینداربوون.

 

چیرۆکی سەرەکی: ماوەی کەمتر لە هەفتەیەکە بارانی بەخوڕ، هەورەبرووسکە و ڕەشەبا نزیکەی 20 شاری ئێرانی گرتووەتەوە و زەرەر و زیانێکی زۆری ماددی و گیانی بە خەڵکی ئەو وڵاتە گەیاندووە.

 

ڕاگەیێنراوی فەرمی: بابەک یەکتاپەرست، سەرۆکی ڕێکخراوی فریاکەوتنی ئێران ڕایگەیاند: بەهۆی نالەباری کەشوهەوا و هەورەبرووسکەوە، 7 کەس گیانیان لەدەستدا و 67 کەسی دیکەش برینداربوون.

 

کاریگەری و لێکەوتەکان: لەو 7 کەسەی گیانیان لەدەست داوە، چوار کەسیان بەهۆی ڕەشەباوە و سێ کەسی دیکەش بەهۆی بەرکەوتنی هەورەبرووسکەوە گیانیان لەدەستداوە.

 

لەلایەکی دیکە: محەممەد حوسێن کەبادی، جێگری ئۆپەراسیۆنەکانی ڕێکخراوی فریاکەوتنی مانگی سووری ئێران، هۆشداری دا لە مەترسی لافاو و ڕەشەبا لە پارێزگاکانی کرماشان، سنە، ئیلام و ورمێ لە ڕۆژهەڵاتی کوردستان و ڕایگەیاند، لە ئامادەباشیدان بۆ ڕووبەڕووبوونەوەی هەر بارودۆخێکی لەناکاو. هاوکات گوتیشی تەنیا لە ڕوانسەری سەر بە کرماشان یەک کەس بەهۆی هەورەبرووسکە گیانی لەدەست داوە و چوارکەسی دیکەش بە سەختی بریندار بوون.